မြန်မာနိုင်ငံ မြောက်ပိုင်းတွင် ကြီးမားသော တယ်လီကွန်း လိမ်လည်မှုတွင် ကာလရှည် ပါဝင်ပတ်သက်မှုဖြင့် ကိုးကန့်ခေါင်းဆောင်ပယ်ဆောက်ချိန်ရာဇ၀တ်ဂိုဏ်း၏ အဓိက အဖွဲ့ဝင်များ တရုတ်အစိုး​ရ၏စွဲချက်အတင်ခံရ

ဇူလိုင်လ ၁၄၊ ၂၀၂၅။ သောင်ရင်းသတင်းလွှာ

ကြာသေးမီက Shenzhen မြူနီစီပါယ် ပြည်သူ့ရှေ့နေချုပ်ရုံးသည် ကိုးကန့်ခေါင်းဆောင်ဟောင်းပယ်ဆောက်က်ချိန် (နိုင်ငံခြားအမည်- Bay Saw Chain)၊ပယ်ရင်ချန် (နိုင်ငံခြားနာမည်- Bay Yin Chin) နှင့် အခြားသော အဓိကတရားခံ ၁၉ ဦး ဖြစ်သည့် စုစုပေါင်း သံသယရှိသူ ၂၁ ဦးကို တရား၀င်တရားစွဲဆိုခဲ့ကြောင်း CCTV သတင်းတွင် ဇူလိုင်လ ၁၁ရက်နေ့က ဖော်ပြထားကြောင်း Global Times သတင်းကဖော်ပြသည်။ ယင်းအဖွဲ့သည် မြန်မာနိုင်ငံ မြောက်ပိုင်း ကိုးကန့်ဒေသတွင် ကာလရှည်ကြာ အမြစ်တွယ်နေခဲ့ပြီး ဆက်သွယ်ရေးနှင့် အွန်လိုင်း လိမ်လည်မှု အပါအဝင် သောင်းကျန်းသော ရာဇ၀တ်မှု လုပ်ငန်းများ လုပ်ဆောင်ကာ လက်နက်ကိုင် ကာကွယ်ရေးတပ်ဖွဲ့များကို အားကိုးလျက် တရုတ် နိုင်ငံသားများကို အဓိက ပစ်မှတ်ထား တိုက်ခိုက်ခဲ့ကြောင်း မီဒီယာများ၏ ဖော်ပြချက်အရ သိရသည်။ တရုတ်နိုင်ငံ၏ ရာဇဝတ်မှုဥပဒေနှင့် ပြစ်မှုဆိုင်ရာလုပ်ထုံးလုပ်နည်းဥပဒေအရ သံသယရှိသူများအား လိမ်လည်မှု၊ လောင်းကစားလုပ်ငန်းလုပ်ကိုင်မှု၊ ငွေညှစ်မှု၊ ရည်ရွယ်ချက်ရှိရှိ လူသတ်မှု၊ ရည်ရွယ်ချက်ရှိရှိ ဒဏ်ရာရစေမှု၊ ပြန်ပေးဆွဲမှု၊ မူးယစ်ဆေးဝါး ရောင်းဝယ်ဖောက်ကားမှုနှင့် ထုတ်လုပ်ရောင်းချမှုတို့ဖြင့် တရားစွဲဆိုထားသည်။ ပယ်ဆောက်က်ချိန် နှင့်ပယ်ရင်ချန် ဦးဆောင်သော ပယ်ရာဇဝတ်ဂိုဏ်းသည် လိမ်လည်မှု၊ ရည်ရွယ်ချက်ရှိရှိ လူသတ်မှု၊ ရည်ရွယ်ချက်ရှိရှိ ဒဏ်ရာရစေမှု၊ ပြန်ပေးဆွဲမှု၊ ငွေညှစ်မှု၊လောင်းကစားလုပ်ငန်း လုပ်ဆောင်မှု၊ တရားမဝင် နယ်စပ်ဖြတ်ကျော်သူများ စုစည်းမှု၊ ပြည့်တန်ဆာ စည်းရုံးမှုနှင့် မူးယစ်ဆေးဝါးရောင်းဝယ် ဖောက်ကားမှုများကိုကျူးလွန်ခဲ့ကြသည်။ အဆိုပါ ရာဇ၀တ်မှုများကြောင့် တရုတ်နိုင်ငံသား ခြောက်ဦးသေဆုံးကာ လိမ်လည်မှု ၃၁၀၀၀ ကျော်၊ လိမ်လည်မှုမှငွေ ယွမ် ၁၀.၆ ဘီလီယံ (ဒေါ်လာ ၁.၅ ဘီလီယံ) ကျော်၊ လောင်းကစားမှ ရရှိသော ယွမ် ၁၈ ဘီလီယံကျော်နှင့် မူးယစ်ဆေးဝါး ထုတ်လုပ်ရောင်းချမှု ၁၁ တန်ခန့် ရှိသည်ဟုဆိုသည်။

ပယ်ဆောက်ချိန် သည် ပယ်မိသားစု၏ အကြီးအကဲဖြစ်ပြီး မြန်မာနိုင်ငံ မြောက်ပိုင်း ကိုးကန့်ဒေသတွင် ၁၉၄၉ ခုနှစ်တွင် မွေးဖွားခဲ့သည်။ တစ်ချိန်က ရှမ်းပြည်နယ် ကိုးကန့်ဒေသ ဥက္ကဋ္ဌအဖြစ် တာဝန်ထမ်းဆောင်ခဲ့ဖူးကြောင်း CCTV သတင်းက ဆိုသည်။ ၎င်း၏ရာထူးသက်တမ်းအတွင်း မိသားစုဝင်များနှင့် သစ္စာရှိနောက်လိုက်အများအပြားကို ဒေသဆိုင်ရာအစိုးရရာထူးများအတွက် ခန့်အပ်ခဲ့ပြီး အရေးကြီးသောဌာနများကို စုစည်းထိန်းချုပ်ခဲ့သည်။ ရှန်ကျန်းပြည်သူ့လုံခြုံရေးဗျူရိုရှိ Bai ရာဇ၀တ်ဂိုဏ်း၏ စုံစမ်းစစ်ဆေးရေးအဖွဲ့၏ လက်ထောက်အကြီးအကဲ Li Linna က ပယ်ဆောက်ချိန်သည် အကြွင်းမဲ့အာဏာဖြင့် အုပ်ချုပ်သည်ဟု မီဒီယာအစီရင်ခံချက်တွင် ပြောကြားထားသည်။ ပယ်မိသားစုအတွင်း၌ဖြစ်စေ ကိုးကန့်ဒေသတစ်ခုလုံးတွင်ဖြစ်စေ ပယ်ဆောက်ချိန်၏ စကားသည် ဥပဒေဖြစ်သည်၊ ရာထူးမှဆင်းပြီးသည့်တိုင် သူ၏သြဇာလွှမ်းမိုးမှုမှာ ကြီးမားဆဲဖြစ်ခဲ့သည်။ ၂၀၁၆ခုနှစ်တွင် သူရာထူးမှနုတ်ထွက်ပြီးချိန်တွင်ပယ်ဆောက်ချိန်သည် သူ၏မိသားစု၏အာဏာကိုချဲ့ထွင်ရန် ရှင်းလင်းသောဗျူဟာတစ်ခုကို ရေးဆွဲထားပြီးဖြစ်သည်။ သူ့သားအကြီးဆုံပယ်ရင်ချန်နှင့် ဒုတိယသား ပယ်ရင်စန် ကို ကိုးကန့်တွင် အရေးပါသော ရာထူးများတွင် ခန့်အပ်ခဲ့ပြီး ရဲတပ်ရင်းနှင့် ပြည်သူ့စစ်များ အပါအဝင် ဒေသခံ လက်နက်ကိုင်တပ်ဖွဲ့များကို ချုပ်ကိုင်ခဲ့သည်။ “နှစ်အတော်ကြာ ရာထူးက နှုတ်ထွက်ခဲ့သော်လည်းပယ်ဆောက်ချိန် သည် အကြွင်းမဲ့ ထိန်းချုပ်ထားဆဲ ဖြစ်သည်။ တစ်ခါတစ်ရံတွင်၊ လူတစ်ဦး၏အသက်ရှင်ခြင်း သို့မဟုတ် သေဆုံးခြင်းကိုပင် ဆုံးဖြတ်နိုင်သည်” ဟု လီက ပြောကြားခဲ့သည်။ ပြည်သူ့လုံခြုံရေး ဝန်ကြီးဌာန (MPS) မှ တရုတ်နိုင်ငံသားများနှင့် ပတ်သက်သည့် မြန်မာနိုင်ငံ မြောက်ပိုင်းတွင် ရာဇ၀တ်မှုများအား နှိမ်နင်းရန် အထူ:စစ်ဆင်ရေး စတင်ဆောင်ရွက်ချိန်မှစ၍ တရုတ်နှင့် မြန်မာတို့သည် တရားဥပဒေ စိုးမိုးရေး ပူးပေါင်းဆောင်ရွက်မှုနှင့် ပူးပေါင်းဆောင်ရွက်မှုများ ဆက်တိုက်ပြုလုပ်၍ တရုတ် တယ်လီကွန်း လိမ်လည်မှုဖြင့်သံသယရှိသူ ၅၇,၀၀၀ ကျော်ကို ဖမ်းဆီးနိုင်ခဲ့သည်။

ကိုးကန့်တွင် နာမည်ဆိုးဖြင့်ကျော်ကြားသော “မိသားစုလေးစု” ရာဇ၀တ်ဂိုဏ်းများသည် ဆိုးရွားသော ထိုးနှက်ချက်များနှင့် ကြုံတွေ့ခဲ့ရသည်။ MPS ၏ တစ်စုတစ်စည်းတည်း ကွပ်ကဲမှုအောက်တွင်၊ ဒေသဆိုင်ရာ ပြည်သူ့လုံခြုံရေး အာဏာပိုင်များသည် အဆိုပါ အစုအဖွဲ့များ နှင့် ပတ်သက်သည့် အမှုများကို စုံစမ်း စစ်ဆေးမှုများ အရှိန်မြှင့် လုပ်ဆောင်ခဲ့သည်။ မကြာသေးမီက ပယ် ရာဇ၀တ်ဂိုဏ်းကိုတရားဝင်တရားစွဲဆိုခဲ့သည်ဟု CCTV သတင်းကဆိုသည်။ အစီရင်ခံစာအရ ၂၀၁၅ ခုနှစ်မှစတင်၍ ပယ်ဆောက်ချိန်ဦးဆောင်သော ကိုးကန့်​ဒေသရှိ ပယ်ရာဇ၀တ်ဂိုဏ်းသည် ကိုးကန့်၏ နိုင်ငံရေး၊ စစ်ရေးနှင့် စီးပွားရေးကဏ္ဍများတွင် မိသားစု၏သြဇာလွှမ်းမိုးမှုကို အသုံးချကာ အကြီးစား လောင်းကစားနှင့် လိမ်လည်မှုဇုန် ၄၁ခုကို ဖွံ့ဖြိုးတိုးတက်အောင် လုပ်ဆောင်ခဲ့သည်။ ဤဇုန်များသည် ရည်ရွယ်ချက်နှစ်ခုဖြင့် ဆောင်ရွက်သည်- တစ်ဖက်တွင်၊ ၎င်းတို့သည် တရုတ်နိုင်ငံသားများကို ပစ်မှတ်ထားသည့် တယ်လီကွန်းလှည့်ဖြားမှုများနှင့် အွန်လိုင်းလောင်းကစားများကို လုပ်ဆောင်သည့် လိမ်လည်မှုနှင့် လောင်းကစားဂိုဏ်းအများအပြားကို ဆွဲဆောင်ခဲ့သည်။ အခြားတစ်ဖက်တွင်မူ အဆိုပါအဖွဲ့သည် တရုတ်နိုင်ငံသားများကို တရားမဝင် နယ်စပ်ဖြတ်ကျော်စေကာ အဆိုပါတရားမဝင် လိမ်လည်သည့်လုပ်ငန်းများတွင် ပါဝင်ရန် စုဆောင်းခြင်း သို့မဟုတ် သွေးဆောင်ခဲ့သည်။ ပယ်ရာဇဝတ်ဂိုဏ်းသည် ကိုးကန့်ဖျော်ဖြေရေး စီမံခန့်ခွဲမှု ကော်မတီကို တည်ထောင်ခဲ့ပြီး အဆိုပါ လောင်းကစား လိမ်လည်မှုဇုန်များတွင် အရောင်းမြှင့်တင်ရေး လိုင်စင်များ ထုတ်ပေးကာ ငှားရမ်းခ၊ တစ်ဦးချင်း အခကြေးငွေ နှင့် လုံခြုံရေး အတွက်ငွေပေးချေမှုပုံစံဖြင့် တရားမ၀င် အကျိုးအမြတ်များ မတန်တဆ စုဆောင်းခဲ့သည်။

မှတ်သားဖွယ်အချက်မှာသူ၏ အဖွဲ့သည် မတော်မတရားပြုမှုများ၊ ခွဲတမ်းမပြည့်မီခြင်း သို့မဟုတ် လွတ်မြောက်ရန် ကြိုးပမ်းသည့် အဆင့်နိမ့်လိမ်လည်မှုလုပ်သားများအပေါ် “”လိမ်လည်သည့်လုပ်ငန်းရှင်များ”မှ အကြမ်းဖက်မှုများကို ပံ့ပိုးခွင့်ပြုပေးခဲ့သည်၊အဆိုပါအလုပ်သမားများသည်ညှဥ်းပန်းရိုက်နှက်ခံရခြင်း တခါတရံတွင်သတ်ဖြတ်ခြင်းပင်ခံခဲ့ကြရပြီး ပယ်မိသားစုကဤဇုန်များပေါ်တွင် လက်နက်ကိုင်တပ်ဖွဲ့များဖြင့်ထိန်းချုပ် ထားခဲ့သည်။ ရဲတပ်ဖွဲ့၏ သက်သေအထောက်အထားများအရ ပယ်မိသားစုသည် တပ်ဖွဲ့ဝင် ၂၀၀၀ ခန့်ရှိသော လက်နက်ကိုင်တပ်ဖွဲ့ကို တိုက်ရိုက်ကွပ်ကဲကြောင်း ဖော်ပြသည်။ ၎င်းတို့အနက် ပယ်ရင်ချန် သည် ပြည်သူ့စစ်တပ်ရင်းမှူးအဖြစ် တာဝန်ထမ်းဆောင်ခဲ့ပြီး ပြည်သူ့စစ်အင်အား ၁,၅၀၀ ကျော်ကို တိုက်ရိုက်ထိန်းချုပ်ထားသည်။ ပယ်မိသားစု၏ ကွပ်ကဲမှုအောက်တွင် အပြည့်အ၀ တပ်ဖြန့်ချထားခြင်းသည် မြန်မာနိုင်ငံ မြောက်ပိုင်းတွင် ဘေးကင်းလုံခြုံသော စခန်းများ တည်ထောင်ရန်နှင့် တယ်လီကွန်းလိမ်လည်မှုမှ အမြတ်အစွန်းရရှိရန် ကြိုးပမ်းနေသည့် ရင်းနှီးမြှုပ်နှံသူများအတွက် ဝင်ခွင့်လက်မှတ်နှင့် လုပ်ခွင့်ပြုခဲ့ခြင်းများဖြစ်လာခဲ့ကြောင်း CCTV သတင်းတွင် ဖော်ပြထားသည်။ ပြည်သူ့စစ်ကို အုပ်စုနှစ်စုခွဲထားပါတယ်။ တစ်ခုမှာ အစားအသောက်၊ နေစရာနဲ့ လက်နက်ကိရိယာတွေကို ကျွန်တော့်ဆီက ထောက်ပံ့ပေးထားတဲ့ ပြည်တွင်းက စုဆောင်းထားတဲ့ ဝန်ထမ်းတွေ ပါပါတယ်၊ သူတို့လိမ်လည်မှုဇုန်တွေကနေ ငှားရမ်းခတွေ ကောက်ခံပါတယ်။ ကျန်အုပ်စုက လိမ်လည်တဲ့နေရာတွေကို ကာကွယ်ပေးတယ်၊ ရင်းနှီးမြှုပ်နှံသူတွေဆီကရတဲ့အခကြေးငွေကို မုတည်ပြီး အဲဒီအခကြေးငွေတွေကို ခွဲဝေပေးတယ်။ တစ်နည်းဆိုရရင် ရင်းနှီးမြှုပ်နှံသူတွေက ဒီတပ်ဖွဲ့တွေကို ငွေကြေးထောက်ပံ့နေတယ်” ဟု ပယ်ရင်ချန်ကမီဒီယာများကိုပြောသည်ဟု ဖော်ပြသည်။ ၂၀၂၃ခုနှစ် နိုဝင်ဘာလတွင် MPS သည် ပယ်ဂိုဏ်းကို စုံစမ်းစစ်ဆေးရန် ရှန်ကျန်းရဲတပ်ဖွဲ့ကို တာဝန်ပေးအပ်ခဲ့သည်။ ဒီဇင်ဘာ ၁၀ရက်တွင် များပြားလှသော အထောက်အထားများကို စုဆောင်းပြီးနောက် ရဲတပ်ဖွဲ့ကပယ်ဆောက်ချိန်၊ပယ်ရင်ချန်နှင့်ပယ်ရင်လန် တို့အတွက် လူသိရှင်ကြား အကြောင်းကြားစာ ထုတ်ပြန်ခဲ့သည်။

၂၀၂၄ ခုနှစ် ဇန်နဝါရီလ ၃၀ ရက်နေ့တွင် တရုတ်-မြန်မာ တရားဥပဒေစိုးမိုးရေးနှင့် လုံခြုံရေး ပူးပေါင်းဆောင်ရွက်မှု ယန္တရားအရ မြန်မာအာဏာပိုင်များသည် ပယ်ဆောက်ချိန်နှင့် ပါ်ရင်ချန်တို့ကို တရုတ်နိုင်ငံသို့ လွှဲပြောင်းပေးအပ်ခဲ့သည်။ ယခုအချိန်အထိပယ်ရာဇဝတ်ဂိုဏ်းမှ အဓိကသံသယရှိသူ ၃၆ ဦးကို တရားစီရင်ရန် တရုတ်နိုင်ငံသို့ပို့ဆောင်ထားသည်။ ပယ်ရာဇဝတ်ဂိုဏ်း သည် တရုတ်နိုင်ငံသားများအပေါ်ကျူးလွန်ခဲ့သည့် ရာဇ၀တ်မှုများ အပြည့်အ၀ဖော်ထုတ်ရန် နှစ်နိုင်ငံပူးပေါင်းဆောင်ရွက်ရေးမူဘောင်အောက်တွင် တရုတ်တရားဥပဒေစိုးမိုးရေးမှ တပ်ဖွဲ့ဝင်များအား မြန်မာနိုင်ငံမြောက်ပိုင်းသို့ ငါးကြိမ်တိုင်တိုင် စေလွှတ်ခဲ့ပြီး ပြင်းထန်သောပဋိပက္ခများကြားမှ မြန်မာအာဏာပိုင်များနှင့် နီးကပ်စွာလုပ်ဆောင်ရန်ဖြစ်သည်။ ၎င်းတို့သည် ကျန်ရစ်နေဆဲ သားကောင်များ(လူကုန်အကူးခံရသူများ)မူးယစ်ဆေးဝါးထုတ်လုပ်သည့် ကိရိယာများနှင့် အခြားအရေးကြီးသော အထောက်အထားများကို ရှာဖွေတွေ့ရှိခဲ့သည်။ တစ်ချိန်တည်းတွင်၊ ရှန်ကျန်းမှ အရာရှိ ၁,၀၀၀ ကျော်အား တရုတ်နိုင်ငံတစ်ဝှမ်းရှိ မြို့ပေါင်း ၂၀၀ ကျော်မှ လိမ်လည်ခံရသူ ထောင်ပေါင်းများစွာအား တွေ့ဆုံမေးမြန်းစေကာ အထောက်အထားများ စုဆောင်းရန်သညွှန်ကြားခဲ့သည်။ Zhoushan၊ Zhejiang ရှိ ပြည်သူ့လုံခြုံရေးတပ်ဖွဲ့များသည် အဓိကသံသယရှိသူများကို ဖမ်းဆီးစစ်ဆေးမေးမြန်းကာ အထောက်အထားကွင်းဆက်များ ဖြည့်သွင်းခြင်းဖြင့် အရေးကြီးသောပံ့ပိုးကူညီမှုများ ဆောင်ရွက်ပေးခဲ့သည်။ ပယ်မိသားစုသည် ကိုးကန့်ဒေသတွင် ၎င်း၏စစ်တပ်နှင့် နိုင်ငံရေးသြဇာကို အသုံးချကာ လက်နက်ကိုင်ကာကွယ်မှုအောက်တွင် ရင်းနှီးမြှုပ်နှံသူများကို စုဆောင်းကာ ခိုအောင်းနိုင်ရန်အကာအကွယ်ပေးခဲ့သည်ဟု ရှန်ကျန်းပြည်သူ့လုံခြုံရေးဗျူရို၏ ပယ် ရာဇ၀တ်ဂိုဏ်း ဥပဒေရေးရာအဖွဲ့၏ ဒုတိယအကြီးအကဲ Li Juanjuan က ပြောကြားကြောင်းCCTV သတင်းဌာန၏ အစီရင်ခံချက်တွင် ပြောကြားထားသည်။

တစ်ဖက်တွင်၊ ၎င်းတို့သည် တယ်လီကွန်းလိမ်လည်မှုအတွက် လက်နက်ကိုင်လုံခြုံရေးနှင့် နေရာများကို ထောက်ပံ့ပေးထားသည်။ အခြားတစ်ဖက်တွင်မူ အဆိုပါ ရင်းနှီးမြှုပ်နှံသူများကလူအင်အားနှင့် နည်းပညာဆိုင်ရာ ပံ့ပိုးမှုများ ပံ့ပိုးပေးခဲ့သည်။ နှစ်ဦးနှစ်ဘက် အပြန်အလှန် မှီခိုအားထားရသောအပြန်အလှန်ဆက်ဆံရေးကို ထူထောင်ခဲ့ကြသည်။ အကြမ်းဖက်မှု သို့မဟုတ် အကျပ်ကိုင်မှုများမှတစ်ဆင့် ၎င်းတို့သည် အဆင့်နိမ့် တယ်လီကွန်း လိမ်လည်လှည့်ဖြားသည့် လူပုဂ္ဂိုလ်များကို ပြင်းထန်စွာ အလွဲသုံးစားလုပ်ကာ စိတ်ပိုင်းဆိုင်ရာ ခြယ်လှယ်မှုနှင့် စီးပွားရေး အမြတ်ထုတ်မှုများ ဖြစ်ပေါ်စေပြီး ကွင်းပိတ် ရာဇ၀တ်မှုဂေဟစနစ်ကို ဖြစ်ပေါ်စေခဲ့ကြောင်း Liက ပြောကြားခဲ့သည်။ ပယ်မိသားစုမှ ထိန်းချုပ်ထားသော တယ်လီကွန်း လိမ်လည်မှုများသည် အလုပ်သမားများအပေါ် အလွန်ရက်စက်ကြမ်းကြုတ်သော ပြစ်ဒဏ်များချမှတ်ရုံသာမက အလွန်စနစ်ကျသော မူဘောင်တစ်ခုအောက်တွင်လည်း လုပ်ဆောင်ခဲ့သည်။ ရုပ်ပိုင်းဆိုင်ရာအလွဲသုံးစားလုပ်မှုနှင့် စီးပွားရေးအမြတ်ထုတ်ခြင်းမှ စိတ်ပိုင်းဆိုင်ရာညှဉ်းပန်းနှိပ်စက်ခြင်းအထိ၊ အဆိုပါလုပ်ဆောင်မှုများသည် ပြည့်စုံသော “စည်းကမ်းစနစ်” ကို ထူထောင်ခဲ့ကြောင်း CCTV News အရ သိရသည်။ အဆင့်နိမ့်သော လိမ်လည်မှုလုပ်ငန်းဆောင်တာများအတွက်၊ ရုပ်ပိုင်းဆိုင်ရာ ပြစ်ဒဏ်ပေးခြင်းနှင့် နှုတ်အလွဲသုံးစားပြုမှုများသည် အဖြစ်များပြီး လူတစ်ဦးချင်းစီသည် ရာဇ၀တ်ဂိုဏ်းများကြားတွင် မကြာခဏ ပြန်လည်ရောင်းချခြင်း သို့မဟုတ် ရောင်းဝယ်ခြင်းများ ပြုလုပ်လေ့ရှိသည်။ နည်းပညာဆိုင်ရာ ကျွမ်းကျင်သူများအတွက်၊ လိမ်လည်မှုနည်းပညာအသစ်များ ဖော်ဆောင်ရာတွင် ပူးပေါင်းဆောင်ရွက်ရန် ငြင်းဆိုသူများသည် သံလှောင်အိမ်များ သို့မဟုတ် မှောင်မိုက်သော သီးခြားအခန်းများတွင် သော့ခတ်ထားကာ ယင်းတို့ကပူးပေါင်းလုပ်ဆောင်ပါမည်ဟုပြောသည့်အချိန်အထိအစာနှင့်ရေကို ဖြတ်တောက်ထားသည်။

စီမံခန့်ခွဲရေးဝန်ထမ်းများအတွက်၊ အဖွဲ့တစ်ဖွဲ့သည် စွမ်းဆောင်ရည်ရည်မှန်းချက်များ ပြည့်မီရန် ပျက်ကွက်ပါက၊ အဖွဲ့ခေါင်းဆောင်သည် ရုပ်ပိုင်းဆိုင်ရာနှင့် စိတ်ပိုင်းဆိုင်ရာ နှိပ်စက်ညှဉ်းပန်းမှု နှစ်ခုလုံးတွင် စုပေါင်းတာဝန်ယူခံရမည်ဖြစ်သည်။ “ဥပမာအားဖြင့်၊ အဖွဲ့အစည်းတစ်ခုက အမျိုးသမီးတွေကို ပြည့်တန်ဆာလုပ်ခိုင်းတဲ့ နေရာတစ်ခုကို ဖော်ထုတ်တွေ့ရှိခဲ့ပါတယ်။ အမျိုးသမီး ၂၀ ကျော်ကို လက်နက်ကိုင်အစောင့်တွေနဲ့ အပြင်မှာ တပ်စွဲထားတာကြောင့် လိင်လုပ်ငန်းမှာ အတင်းအကြပ် ဖိအားပေးခံရပြီး သူတို့ဟာထွက်ပြေးဖို့ ဒါမှမဟုတ် ခုခံဖို့ မဖြစ်နိုင်ပါဘူး” ဟု Li Juanjuan ၏ ပြောကြားချက်ကို ကိုးကား၍ မီဒီယာများတွင် ဖော်ပြခဲ့သည်။ ဤအမျိုးသမီးများအပေါ် သက်ရောက်နေသော စိတ်ပိုင်းဆိုင်ရာနှင့် ရုပ်ပိုင်းဆိုင်ရာ ပျက်စီးဆုံးရှုံးမှုများသည် ကျွန်ုပ်တို့၏ အမှုတွဲပြန်လည်သုံးသပ်မှုတစ်လျှောက်တွင် ထင်ရှားပေါ်လွင်သည် – ၎င်းတို့၏ စိတ်ပျက်အားငယ်မှုခံစားချက်နှင့် ၎င်းတို့၏လွတ်လပ်ခွင့်အပေါ် ပြင်းထန်စွာကန့်သတ်ချက်များကို ထုတ်ဖော်ပြသခဲ့ကြောင်း Liက ပြောကြားခဲ့သည်။ ပယ် ရာဇ၀တ်ဂိုဏ်းမှ အဓိက သံသယရှိသူ ၃၆ ဦးကို တရားမျှတမှုအတွက် ရုံးတင်စစ်ဆေးရန် စောင့်ဆိုင်းနေသော်လည်း ကျန်တရားခံပြေးများကိုလည်း တရုတ်ရဲတပ်ဖွဲ့က ဆက်လက်ခြေရာခံမည်ဖြစ်သည်။ “ထွက်ပြေးနေသူအချို့ ကျန်ရှိနေသေးတာကြောင့် မကျေနပ်မှုတွေ ရှိနေသေးပါတယ်။ သူတို့ကို ခြေရာခံပြီးပြန်လည်ဖမ်းဆီးဖို့ ကြိုးပမ်းမှုတွေ ဆက်လက်လုပ်ဆောင်ရမှာဖြစ်ပြီး တယ်လီကွန်းလိမ်လည်မှုတွေကို နှိမ်နင်းရာမှာ တရုတ်ရဲတွေရဲ့ ခိုင်မာတဲ့ သန္နိဋ္ဌာန်ကို ပြသနေပါတယ်” ဟု မှုခင်းစုံစမ်းစစ်ဆေးရေးဌာန လက်ထောက်အကြီးအကဲ Feng Haidong က ရှန်ကျန်းပြည်သူ့လုံခြုံရေးဗျူရို၏ အစီရင်ခံစာကို ကိုးကား၍ ပြောကြားခဲ့သည်။

အဲမောင်း
Global Times သတင်းတွင်ဖော်ပြသည့် Key members of Bai crime syndicate indicted for long-term involvement in large-scale telecom fraud in northern Myanmar ကိုပြန်ဆိုသည်။