မြန်မာနိုင်ငံတွင် လူကုန်ကူးခံရသူအင်ဒိုနီးရှားနိုင်ငံသား ၄၀၀ ကို ကယ်တင်ခဲ့

မတ်လ ၁၈၊ ၂၀၂၅။ သောင်ရင်းသတင်းလွှာ

မြန်မာနိုင်ငံ မြဝတီမြို့မှ အွန်လိုင်း လိမ်လည်မှုများနှင့် ဆက်စပ်၍ လူကုန်ကူးမှု ခံခဲ့ရသည့် ၎င်း၏ နိုင်ငံသား ၄၀၀ ကို တနင်္လာနေ့တွင် အင်ဒိုနီးရှား နိုင်ငံမှ ကယ်ထုတ် ခဲ့ဟုသတင်းရရှိသည်။ အင်ဒိုနီးရှားနိုင်ငံခြားရေး ဝန်ကြီးဌာနမှ နိုင်ငံသားများ ကာကွယ်ရေး ဒါရိုက်တာ Judha Nugraha က ရွှေ့ပြောင်း ဒုက္ခသည် များကို မြန်မာမှ နယ်စပ် ဖြတ်ကျော်ပြီး အမှတ် ၂ ချစ်ကြည်ရေး တံတားမှ တဆင့် ထိုင်းနိုင်ငံ မဲဆောက် သို့ ပို့ဆောင် ပေးခဲ့ကြောင်းပြောကြားခဲ့သည်ဟု Jakata Globe သတင်းကမတ်လ ၁၈ ရက်တွင်ဖော်ပြသည်။

“ကျန်းမာရေးစစ်ဆေးမှုနဲ့ လွှဲပြောင်းရေး ယန္တရား လုပ်ငန်းစဉ်တွေ ဆောင်ရွက်ပြီးနောက် သူတို့ကို ဘန်ကောက်မြို့ဒွန်မောင်းလေဆိပ်ကို ဘတ်စ်ကား ၉စီးနဲ့ ၁၀ နာရီကြာ ကုန်းလမ်းခရီးနဲ့ သွားခဲ့ပါတယ်။ အဲဒီကနေ အင်ဒိုနီးရှားနိုင်ငံကို စင်းလုံးငှားလေယာဉ်နဲ့ ပြန်လည်ထွက်ခွာမှာဖြစ်ပါတယ်” ဟု Judha က မတ်လ ၁၈ ရက်နေ့တွင် ထုတ်ပြန်ခဲ့သည်။ လူကုန်ကူးခံရသူ ၄၀၀ တွင် အမျိုးသား ၃၁၃ ဦး၊ အမျိုးသမီး ၈၇ ဦးဖြစ်ကြပြီး၎င်းတို့အနက် အမျိုးသမီး ခြောက်ဦးသည် ကိုယ်ဝန်ရှိနေကြသည်ဟုဆိုသည်။

ဘန်ကောက်နှင့် ရန်ကုန်ရှိ အင်ဒိုနီးရှားသံရုံးများမှ တာဝန်ရှိသူများအပြင် အင်ဒိုနီးရှား အမျိုးသားရဲတပ်ဖွဲ့၏ နိုင်ငံတကာဆက်ဆံရေးဌာနမှ တာဝန်ရှိသူများနှင့်အတူ မြဝတီမြို့မှ အင်ဒိုနီးရှားနိုင်ငံသို့ ဒုက္ခသည်များအား ဖော်ထုတ်ခြင်း၊ စောင့်ကြပ်ကြည့်ရှုခြင်းနှင့် အကူအညီပေးခြင်းတို့ကို ကြီးကြပ်ဆောင်ရွက်လျက်ရှိသည်။ “အင်ဒိုနီးရှားနိုင်ငံသားတွေကို မြဝတီကနေ ချောချောမွေ့မွေ့ ရွှေ့ပြောင်းနိုင်ရေးအတွက် အကြိတ်အနယ် ညှိနှိုင်းပြီး ထိုင်းနဲ့ မြန်မာ အာဏာပိုင်တွေရဲ့ ပံ့ပိုးကူညီမှုတွေ အပြည့်အ၀နဲ့ လုပ်ဆောင်နိုင်ခဲ့ပါတယ်” ဟု Judha က ပြောကြားခဲ့သည်။

၄င်းတို့တို့သည် Cengkareng ရှိ Soekarno-Hatta အပြည်ပြည်ဆိုင်ရာလေဆိပ်သို့ဂျာကာတာစံတော်ချိန်မတ်လ ၁၉ ရက်နေ့နံနက် ၉ နာရီတွင်ရောက်ရှိရန် စီစဉ်ထားသည်။ ထိုင်းနိုင်ငံဆိုင်ရာ အင်ဒိုနီးရှားသံအမတ် Rachmat Budiman က နေရပ်ပြန်ပို့ရေး ကြိုးပမ်းမှုတွေကို ဦးဆောင်သည်။ အင်ဒိုနီးရှားနိုင်ငံမှ လူကုန်ကူးခံရသူ ၁၅၄ ဦးကို မြဝတီမြို့မှ မဲဆောကက်မြို့သို့ မတ်လ ၁၈ ရက်နေ့တွင်ပို့ဆောင်မည်ဖြစ်ကြောင်း နိုင်ငံခြားရေး ဝန်ကြီးဌာနက အတည်ပြုပြောကြားသည်။