မတ်လ ၁၈၊ ၂၀၂၅။ သောင်ရင်းသတင်းလွှာ
အမေရိကန်၏ လူသားချင်းစာနာထောက်ထားမှုဆိုင်ရာ အကူအညီများ ဖြတ်တောက်မှုသည် မြန်မာနိုင်ငံရှိ ပြည်သူများအပေါ် ဆိုးရွားစွာ သက်ရောက်မှုများ ရှိနေကြောင်းနှင့် အကြမ်းဖက်မှုများ ပျံ့နှံ့လာဖွယ်ရှိကြောင်း မြန်မာနိုင်ငံ လူ့အခွင့်အရေး အခြေအနေဆိုင်ရာ ကုလသမဂ္ဂ အထူးကိုယ်စားလှယ် မစ္စတာ သောမတ်စ်အင်ဒရူးစ်က မတ် ၁၇ ရက်က ဂျီနီဗာတွင် ပြုလုပ်သည့် သတင်းစာရှင်းလင်းပွဲတွင် ပြောကြားခဲ့သည်ဟု The Straits Times သတင်းကဖော်ပြသည်။
2021 ခုနှစ်တွင် အာဏာသိမ်းခဲ့သော စစ်အာဏာရှင်များ၏ လေကြောင်းတိုက်ခိုက်မှုနှင့် အကြမ်းဖက်မှုများ တိုးမြင့်လာသောကြောင့် ပြည်သူများကို ထောက်ပံ့သည့် အစားအစာနှင့် ကျန်းမာရေး အစီအစဉ်များကို ရုတ်တရက် ဖြတ်တောက်လိုက်ခြင်းသည် လူသားချင်းစာနာမှုဆိုင်ရာ အခြေအနေကို ပိုမိုဆိုးရွားစေသည်ဟု မစ္စတာ အန်ဒရူးက ပြောကြားခဲ့သည်။
“အဓိကအားဖြင့် အမေရိကန်အစိုးရရဲ့ ထောက်ပံ့မှု ရုတ်တရက် ရုပ်သိမ်းလိုက်တာဟာ မြန်မာပြည်သူပြည်သားတွေအပေါ် ဆိုးဆိုးရွားရွား သက်ရောက်မှုရှိနေပါပြီ” ဟု ၎င်းကဆက်လက်ပြောသည်။
ဇန်နဝါရီလ ၂၉ ရက်နေ့တွင် ရာထူးတက်လာချိန်တွင် အမေရိကန်သမ္မတ ဒေါ်နယ်ထရန့်က ၎င်း၏ အမေရိကန်ပထမ နိုင်ငံခြားရေးမူဝါဒနှင့် ကိုက်ညီမှုရှိမရှိ ပြန်လည်သုံးသပ်ရန် နိုင်ငံခြားအကူအညီအားလုံးကို ရက် ၉၀ ဆိုင်းငံ့ထားရန် အမိန့်ပေးခဲ့သည်။မကြာသေးမီက ထုတ်ပြန်ခဲ့သည့် ကမ္ဘာ့စားနပ်ရိက္ခာအစီအစဉ်မှ ဖြတ်တောက်မှုများသည် လက်ရှိအခြေအနေများကို ပိုမိုဆိုးရွားစေနိုင်ကြောင်း မစ္စတာအင်ဒရူးစ်က ပြောကြားပြီး နိုင်ငံအနောက်ဘက်ရှိ ရခိုင်ပြည်နယ်တွင် အငတ်ဘေးကြုံတော့ မည်ဟု သတိပေးထားသည်။
မြန်မာနိုင်ငံရှိ လူများသည်လည်း ဆေးဝါးကုသမှု ခံယူခွင့် ဆုံးရှုံးခဲ့ရပြီး အချို့သော HIV လူနာများသည် လွန်ခဲ့သည့် ခုနစ်ပတ်အတွင်း ၎င်းတို့၏ ဆေးဝါးများကို အမေရိကန်မှ ထောက်ပံ့ထားသော ကျန်းမာရေး အစီအစဉ်များကြောင့် သောက်သုံးခွင့် ဆုံးရှုံးခဲ့ကြောင်း သူက ရှင်းပြသည်။ “ဒါက ကြီးမားတဲ့ ကပ်ဆိုးကြီးပါပဲ၊ မလိုအပ်ဘဲနဲ့ ရက်စက်ရာရောက်ပါတယ်” ဟု ဂျီနီဗာမြို့ရှိ မြန်မာနိုင်ငံဆိုင်ရာ လူ့အခွင့်အရေးအခြေအနေဆိုင်ရာ ကုလသမဂ္ဂ အစီရင်ခံစာအသစ်တွင် တွေ့ရှိချက်များကို မျှဝေခဲ့သည့်အခမ်းအနားတွင်သတင်းထောက်များအားမစ္စတာ အင်ဒရူးစ်က ပြောကြားခဲ့သည်။
မတည်မငြိမ်ဖြစ်နေသော အခြေအနေများသည် လူများကို လိင်ပိုင်းဆိုင်ရာ ခေါင်းပုံဖြတ်ခြင်းနှင့် လူကုန်ကူးခြင်းသို့ တွန်းအားပေးကာ မြန်မာနယ်စပ်မှ အိမ်နီးချင်း ဘင်္ဂလားဒေ့ရှ်နိုင်ငံသို့ ဖြတ်ကျော်ဝင်ရောက်လာသူများ ပိုမိုများပြားလာမည်ဖြစ်ကြောင်း ကုလသမဂ္ဂ အထူးကိုယ်စားလှယ်က သတိပေးခဲ့သည်။ နိုဘယ်ငြိမ်းချမ်းရေးဆုရှင် ဒေါ်အောင်ဆန်းစုကြည် ဦးဆောင်သော ရွေးကောက်ခံ အရပ်သားအစိုးရကို စစ်တပ်က ဖြုတ်ချပြီး ၂၀၂၁ ခုနှစ် အစောပိုင်းကတည်းက ရုန်းရင်းဆန်ခတ်ဖြစ်ခဲ့ပြီး မြန်မာနိုင်ငံတစ်ဝှမ်းတွင် စစ်အစိုးရကို လက်နက်ကိုင်ပုန်ကန်မှုအဖြစ် အသွင်ပြောင်းသည့် ဆန္ဒပြလှုပ်ရှားမှုကို ဖြစ်ပေါ်စေခဲ့သည်။
