မတ်လ ၁၉၊ ၂၀၂၅။ သောင်ရင်းသတင်းလွှာ
မကြာသေးမီက တရုတ်နိုင်ငံသို့ ဝီဂါများ ပြည်နှင်ဒဏ်ခံရမှုတွင် ပါဝင်ပတ်သက်နေသည့် ထိုင်းအရာရှိများအတွက် ဗီဇာကန့်သတ်ထားမည်ဟု ကြေညာပြီးနောက် ထိုင်းနိုင်ငံခြားရေး ဝန်ကြီးဌာနအား အမေရိကန်နှင့် စကားပြောရန် တာဝန်ပေးခဲ့သည်ဟု The Nation သတင်းကမတ်လ ၁၈ ရက်ကဖော်ပြသည်။ မတ်လ ၁၈ ရက်နေ့ အပတ်စဉ်အစိုးရ အစည်းအဝေး မတိုင်မီ သတင်းထောက်များအား ပြောကြားရာတွင် ဝန်ကြီးချုပ် Paetongtarn Shinawatra က ထိုင်းနိုင်ငံခြားရေး ဝန်ကြီးဌာနသည်ဝီဂါများကို နေရပ်ပြန်ပို့ခြင်းနှင့် ပတ်သက်၍ ထိုင်းနိုင်ငံ၏ ရပ်တည်ချက်ကို ရှင်းပြမည်ဖြစ်ကြောင်း ပြောကြားခဲ့သည်။
သူ့ကို ဗီဇာကန့်သတ်ချက်များပါဝင်သလားဟုမေးသည့်အခါ ဝန်ကြီးချုပ်က “မသိသေးပါဘူး” ဟု ပြောကြားခဲ့သည်။ အဆောက်အဦးတစ်ခုသို့ဝင်ရောက်သွားစဉ် Paetongtarn က နှစ်နိုင်ငံစကားပြောပြီးသည်နှင့် ဆိုးရွားသော သက်ရောက်မှုများ ဖြစ်နိုင်ဖွယ်မရှိဟု ထင်ကြောင်း ပြောကြားခဲ့သည်။ ပြီးခဲ့သည့်မတ်လ ၁၄ ရက်နေ့တွင် အမေရိကန် နိုင်ငံခြားရေးဝန်ကြီး Marco Rubio က ထိုင်းနိုင်ငံအား ပြစ်တင်ရှုတ်ချခဲ့ပြီး အခြားနိုင်ငံများမှ ဝီဂါများကို တရုတ်ပိုင်နက်သို့ ပြန်ပို့ရန် ဖိအားပေးသည်ဟု အမေရိကန်က စွပ်စွဲထားသည့် တရုတ်နိုင်ငံကိုလည်း ရှုတ်ချခဲ့သည်။
တရုတ်လူနည်းစုအုပ်စုဝင်များသည် ညှဉ်းပန်းနှိပ်စက်မှုနှင့် အတင်းအကြပ် ပျောက်ဆုံးမှုများ ကြုံတွေ့ရကြောင်း အိမ်ဖြူတော်က အခိုင်အမာ ပြောကြားခဲ့သည်။ဖေဖေါ်ဝါရီ ၂၇ ရက်နေ့တွင် ထိုင်းနိုင်ငံသည် ဝီဂါလူမျိုး ၄၀ ကို တရုတ်ပြည်သို့ စေလွှတ်ခဲ့ပြီး ၎င်းတို့အားလက်ခံမည်ဟုမည်သည့်နိုင်ငံမှ အခိုင်အမာ မကြေညာသဖြင့်ထိုင်းနိုင်ငံသည် ၎င်းတို့အဖွဲ့ကို နှစ်ပေါင်းများစွာ ထိန်းသိမ်းထားသည်ဟု ဆိုသည်။ အဆိုပါ လုပ်ရပ်သည် အဖွဲ့အစည်းအများအပြား၏ ဝေဖန်မှုကို မြင့်တက်စေခဲ့သည်။ နေရပ်ပြန်ပို့ချိန်အတွင်း သဘောတူညီထားသည့်အတိုင်း ထိုင်းအာဏာပိုင်များသည် ရှင်ကျန်းမြို့သို့ ယခုသီတင်းပတ်အတွင်း သွားရောက်မည်ဖြစ်ပြီး ၎င်းတို့၏ ကျန်းမာရေးကို စောင့်ကြည့်မည်ဟုလည်းဆိုသည်။
