မတ်လ ၂၂၊ ၂၀၂၅။ သောင်ရင်းသတင်းလွှာ
ရှမ်းပြည်နယ်ကနေ ထိုင်းနိုင်ငံ ချင်းမိုင် နဲ့ ချင်းရိုင်ခရိုင်ထဲကို စီးဝင်တဲ့ နမ့်ခုတ်မြစ်ရေမှာ ဆိုင်ရာနိုက်အဆိပ်ပါဝင်မှု ရှိမရှိ ချင်းရိုင်ခရိုင် သဘာဝသယံဇာတနဲ့ပတ်ဝန်းကျင်ရုံးကနေ စစ်ဆေးနေတယ်လို့ ထိုင်းသတင်းကဆိုတယ်လို့BBC ကမတ်လ ၂၁ ရက်ကဖော်ပြပါတယ်။
ထိုင်း-မြန်မာနယ်စပ်နဲ့ ၂၂ မိုင်ဝန်းကျင်မှာရှိတဲ့ မိုင်းဆတ် မြို့နယ်ထဲက ဝ တပ်ဖွဲ့ UWSA ထိန်းချုပ်ထားရာ တရုတ်ကုမ္ပဏီတွေ ဦးစီးကာ ရွှေတူးဖော်နေတာကြောင့် ဒီလုပ်ငန်းမှာအဓိကသုံးတဲ့ ဆိုင်ရာနိုက်အဆိပ်ရေထဲ ပါဝင်မှာကို ထိုင်းဘက်က စိုးရိမ်နေတာပါ။
လွန်ခဲ့တဲ့ ရက်ပိုင်းမှာ နမ့်ခုတ်မြစ်ရေဟာ ရွှံစေးရောင်နောက်ကျိလာတာကြောင့် ထိုင်း ဒေသခံတွေဘက်က စိုးရိမ်မှု မြင့်တက်နေတာလည်း ဖြစ်ပါတယ်။ မတ် ၁၄ ရက်တုန်းကလည်း နမ့်ခုတ်မြစ်ကို ကာကွယ်ဖို့ ထိုင်းဒေသခံ ၇၀၀ ကျော် ဆန္ဒ ထုတ်ဖော်ခဲ့ကြပါတယ်။ ရှမ်းပြည်နယ်အရှေ့ပိုင်း၊နမ့်ခုတ်မြစ်ပေါ်က ရွှေတူးဖော်မှုနဲ့ သစ်တောခုတ်ထွင်မှုတွေက နိုင်ငံ ဖြတ်ကျော်အကျိုးသက်ရောက်တာတွေရှိနေလို့ ဆန္ဒထုတ်ဖော်ကြတာလို့ ရှမ်းလူ့အခွင့် အရေး မဏ္ဍိုင် SHRF ကမတ် ၁၄ ရက်မှာ ပြောထားတာပါ။
SHRF ရဲ့ ထုတ်ပြန်ချက်အရ ၂၀၂၃ ခုနစ်ကစပြီး UWSA တပ်ဖွဲ့ထိန်းချုပ် ထားတဲ့ မိုင်းဆတ်မြို့တောင်ပိုင်းနဲ့ မိုင်းယွန်းမြို့တို့က နမ့်ခုတ်မြစ်ကမ်းတလျှောက်မှာ အကြီးစား ရွှေတူးဖော်တွေရှိပြီး လွန်ခဲ့တဲ့လတွေမှာ ၂၄နာရီပတ်လုံး လည်ပတ်နေတယ်လို့ ဆိုပါတယ်။ တရုတ်ကုမ္ပဏီ ၄ ခုက တရုတ်နိုင်ငံသားအများစု ပါဝင်တဲ့ အလုပ်သမား ၃၀၀ လောက်နဲ့ တူးဖော်နေတာလို့လည်း SHRF က ပြောထားပါတယ်။
