မတ်လ ၂၂၊ ၂၀၂၅။ သောင်ရင်းသတင်းလွှာ
ကျန်းမာရေးအကြောင်းပြချက်နဲ့ အနားယူခွင့်ပြုထားတဲ့ ယာယီသမ္မတဦးမြင့်ဆွေကို နှစ်ပတ်တခါ ကျန်းမာရေးစောင့်ရှောက်မှုပေးနေတယ်လို့ ဆေးဝန်ထမ်း ညွှန်ကြားရေးမှူးရုံးက အရာရှိတစ်ဦးက BBCကိုပြောပါတယ်။”ဆရာဝန် နှစ်ယောက်ပုံမှန်လွှတ်ပေးနေပါတယ်” လို့ သူကပြောပါတယ်။
ယာယီသမ္မတဦးမြင့်ဆွေရဲ့ လက်ရှိကျန်းမာရေးအခြေအနေကို ဘီဘီစီကမေးမြန်းတဲ့အခါ အသေးစိတ်ကိုထုတ်ပြောခွင့်မရှိဘူး လို့ အဲဒီအရာရှိကပြောပါတယ်။ ”နှစ်ပါတ်တစ်ခါ ပုံမှန်သွားကြည့်ဖြစ်ပါတယ်” လို့ သူက ထပ်ပြောပါတယ်။ ဦးမြင့်ဆွေကို မနှစ်က ဇူလိုင်မှာ အနားယူခွင့်ပြုခဲ့တာဖြစ်ပြီး အဲဒီကာလတွေတုန်းက ဆရာဝန်တွေကို ဒုတိသမ္မတ(၁)အိမ်တော်မှာပဲ ၂၄ နာရီနေခိုင်းခဲ့တယ် လို့ သိရတယ်။
မနှစ်က ဇူလိုင်လ ၁၈ ရက်မှာ ဦးမြင့်ဆွေ ရဲ့ ကျန်းမာရေးအခြေအနေကို အသေးစိတ်ထုတ်ပြန်ခဲ့ပြီး ယာယီသမ္မတတာဝန်တွေကို ဆက်ပြီးမထမ်းဆောင်နိုင်တော့ဘူး လို့ စစ်ကောင်စီက ထုတ်ပြန်ခဲ့ပါတယ်။ အဲဒီနောက် ဇူလိုင် ၂၂ ရက် မှာမင်းအောင်လှိုင်က ယာယီသမ္မတ တာဝန်ကို ရယူခဲ့တာဖြစ်ပါတယ်။
