ရာဇ၀တ်မှုဆိုင်ရာ ခြိမ်းခြောက်မှုများကြားတွင်ထိုင်း နယ်စပ်လုံခြုံရေး အစီအမံများကို အရှိန်အဟုန်မြှင့် ဆောင်ရွက်လျက်ရှိ

မတ်လ ၂၃၊ ၂၀၂၅။ သောင်ရင်းသတင်းလွှာ

နိုင်ငံဖြတ်ကျော် ရာဇ၀တ်မှုများ မြင့်တက်လာနေချိန်တွင် ထိုင်းအစိုးရက နယ်စပ်လုံခြုံရေး အစီအမံများကို အရှိန်မြှင့် ဆောင်ရွက်လျက်ရှိသည်ဟု ဘန်ကောက်ပို့စ်သတင်းက မတ်လ ၂၃ရက်တွင်ဖော်ပြသည်။ အမျိုးသားလုံခြုံရေးကောင်စီ၏ ဥက္ကဋ္ဌလည်းဖြစ်သည့် ကာကွယ်ရေးဝန်ကြီး Phumtham Wechayachai သည် မတ်လ ၂၂ ရက်နေ့က ပြုလုပ်သည့် နယ်စပ်ဒေသများတွင် လုံခြုံရေးခြိမ်းခြောက်မှုများ တားဆီးရေးနှင့် ဖြေရှင်းရေး ကော်မတီ၏ ဒုတိယအကြိမ် အစည်းအဝေးသို့ တက်ရောက်ခဲ့သည်။ အစည်းအဝေးတွင် တာဝန်ရှိသူများက ဆိုက်ဘာရာဇ၀တ်ကောင်များနှင့် လူကုန်ကူးသူများဟု သံသယရှိသော မြန်မာနိုင်ငံဘက်ရှိနေရာအချို့သို့ လောင်စာဆီတင်ပို့မှု၊ လျှပ်စစ်နှင့် ဆက်သွယ်ရေးအချက်ပြမှုများကို ရပ်ဆိုင်းပြီးနောက် လုံခြုံရေးအခြေအနေများကို ပြန်လည်သုံးသပ်ခဲ့သည်။

၎င်းတို့သည် ပင်မကော်မတီ၏ လုပ်ငန်းဆောင်တာများကို ပံ့ပိုးပေးရန်အတွက် ဥပဒေအကြံပေးကော်မတီတစ်ရပ်ကို ထူထောင်ကာ ကုန်းကြောင်း၊ ရေကြောင်းနှင့် လေကြောင်း အပါအဝင် မူးယစ်ဆေးဝါး ရောင်းဝယ်ဖောက်ကားမှု အပါအဝင် သီးခြားခြိမ်းခြောက်မှုများကို ကိုင်တွယ်ဖြေရှင်းရန် အထူးပြုစစ်ဆင်ရေးဌာနများ ကိုလည်း ထည့်သွင်းစဉ်းစားခဲ့သည်။ တွေ့ဆုံပွဲအပြီးတွင် မြန်မာနိုင်ငံအတွက် လျှပ်စစ်၊ အင်တာနက်နှင့် လောင်စာဆီ ကန့်သတ်ချက်များကို ဖြေလျှော့ပေးမည်မဟုတ်ကြောင်း ပြောကြားခဲ့ပြီး အိမ်နီးချင်းနိုင်ငံ၏ အချို့နေရာများတွင် ဆက်လက်လည်ပတ်နေသည့် ရာဇဝတ်မှုကွန်ရက်များကို တိုက်ဖျက်ရန်အတွက် အဆိုပါအစီအမံများ လိုအပ်ကြောင်း ပြောကြားခဲ့သည်။

အစိုးရသည် နိုင်ငံဖြတ်ကျော် ရာဇ၀တ်မှုများကို တားဆီးရန် ကြိုးပမ်းနေသည်ဟုဆိုသည်။ Mr Phumtham သည် အွန်လိုင်းငွေလိမ်ဂိုဏ်းလုပ်ငန်းများကို မြန်မာနိုင်ငံ၊ မြဝတီမြို့မှ ကမ္ဘောဒီးယားနှင့် ဗီယက်နမ်ရှိ အခြားနေရာများသို့ ပြောင်းရွှေ့နေကြောင်း မှတ်ချက်ပြုခဲ့သည်။ ပိုမိုကောင်းမွန်သော ပူးပေါင်းဆောင်ရွက်မှုများ မြှင့်တင်ရန်အတွက် ထိုင်းနိုင်ငံသည် ကမ္ဘောဒီးယားနိုင်ငံ၏ အမျိုးသားကာကွယ်ရေးနှင့် ပြည်ထဲရေးဝန်ကြီးများအပြင် လာအိုရှိ အာဏာပိုင်များထံ ဆက်သွယ်ခဲ့ကြောင်း ၎င်းက ပြောကြားခဲ့သည်။

မြန်မာနိုင်ငံနှင့် နယ်နိမိတ်ချင်း ထိစပ်နေသည့် တာ့ခ်ခရိုင်ရှိမြို့နယ်ငါးခုကို အထူးလုံခြုံရေးဇုန်အဖြစ် သတ်မှတ်ရန် အဆိုပြုချက်နှင့် ပတ်သက်၍ စီးပွားရေးဆိုင်ရာ အကျိုးသက်ရောက်မှုနှင့် ဖြစ်နိုင်ခြေကို အကဲဖြတ်ရန် ပထမဆုံး ဆွေးနွေးမှုများ ပြုလုပ်မည်ဖြစ်ကြောင်း Mr Phumtham က ပြောကြားခဲ့သည်။ အွန်လိုင်းလိမ်လည်မှုပြဿနာအတွက် ရေရှည်ဖြေရှင်းနည်းများအကြောင်း မေးမြန်းသောအခါ၊ ထိုသို့သောအွန်လိုင်းငွေလိမ်ဂိုဏ်း
များ၏အချက်အချာနေရာတွင်ရှိသော နိုင်ငံနှင့်ပူးပေါင်းဆောင်ရွက်သင့်သည်ဟု အကြံပြုခဲ့သည်။