အိန္ဒိယပြည်ပရေးရာဝန်ကြီးနှင့် မြန်မာနိုင်ငံဆိုင်ရာ ကုလသမဂ္ဂ အထူးကိုယ်စားလှယ် Julie Bishop တို့ နယ်စပ်တည်ငြိမ်ရေးနှင့် ဒုက္ခသည်များဆိုင်ရာ အခြေအနေများကို ဆွေးနွေးခဲ့

မတ်လ ၂၆၊ ၂၀၂၅ ။ သောင်ရင်းသတင်းလွှာ

အိန္ဒိယပြည်ပရေးရာဝန်ကြီး S Jaishankar သည် မြန်မာနိုင်ငံဆိုင်ရာ ကုလသမဂ္ဂအထွေထွေအတွင်းရေးမှူးချုပ်၏ အထူးသံတမန် Julie Bishop နှင့် မတ်လ ၂၅ ရက်နေ့က ဒေလီမြို့၌ တွေ့ဆုံခဲ့ပြီး နယ်စပ်တည်ငြိမ်ရေး၊ ဒုက္ခသည်အခြေအနေ၊ နိုင်ငံဖြတ်ကျော် ရာဇ၀တ်မှုများနှင့် စီးပွားရေးဆိုင်ရာ အထောက်အပံ့များ ပေးအပ်နိုင်ရေးတို့ကို ဆွေးနွေးခဲ့ကြသည်။ တွေ့ဆုံစဉ် S Jaishankar နှင့် Julie Bishop တို့သည် နိုင်ငံရေး အခြေအနေများကို အမြင်ချင်းဖလှယ် ဆွေးနွေးခဲ့ကြသည်ဟု Tribuneသတင်းကဖော်ပြသည်။

Jaishankar က “မြန်မာနိုင်ငံဆိုင်ရာ ကုလသမဂ္ဂ အထူးသံတမန် Julie Bishop ကို ယနေ့ညနေပိုင်းတွင် ဒေလီတွင် တွေ့ဆုံရသည့်အတွက် ဝမ်းမြောက်မိပါသည်။ နယ်စပ်တည်ငြိမ်ရေး၊ ဒုက္ခသည်အခြေအနေ၊ မြန်မာနိုင်ငံမှ ဖြတ်ကျော်မှုခင်းများ နှင့် စီးပွားရေးဆိုင်ရာ အထောက်အပံ့များ ပေးအပ်ခြင်းတို့ကို ဆွေးနွေးခဲ့ပါသည်။ နိုင်ငံရေး အခြေအနေများကို အမြင်ချင်းဖလှယ် ဆွေးနွေးခဲ့ပါသည်” ဟုဆိုသည်။

ပြီးခဲ့သည့်နှစ် ဧပြီလတွင် ကုလသမဂ္ဂအထွေထွေအတွင်းရေးမှူးချုပ် အန်တိုနီယို ဂူတာရက်စ်က သြစတြေးလျနိုင်ငံမှ Julie Bishop အား ၎င်း၏ မြန်မာနိုင်ငံဆိုင်ရာ အထူးသံတမန်အဖြစ် ခန့်အပ်ကြောင်း ကြေညာခဲ့သည်။