မြန်မာအွန်လိုင်းငွေလိမ်ဂိုဏ်းပြစ်မှုကျူးလွန်ခဲ့သူဟု သံသယဖြစ်ဖွယ်ရှိသူကို အင်ဒိုနီးရှားရဲကဖော်ထုတ်

မတ်လ ၂၆၊ ၂၀၂၅။ သောင်ရင်းသတင်းလွှာ

အင်ဒိုနီးရှားနိုင်ငံ အမျိုးသား ရဲတပ်ဖွဲ့၏ မှုခင်းစုံစမ်းစစ်ဆေးရေး အေဂျင်စီ (Bareskrim POLRI) သည် ကျူးလွန်သူအုပ်စု၏ တစ်စိတ်တစ်ပိုင်းအဖြစ် လူငါးဦးကို ရှာဖွေဖော်ထုတ်ခဲ့ပြီး အင်ဒိုနီးရှား ရွှေ့ပြောင်းအလုပ်သမားများ ပါဝင်သော မြန်မာနိုင်ငံတွင် အွန်လိုင်း လိမ်လည်လှည့်ဖြားမှုလုပ်ငန်းတွင်ပါဝင်ခဲ့သည်ဟုသံသယဖြစ်ဖွယ်ရှိသည်ဟု RRI သတင်းကဖော်ပြသည်။။

မြန်မာနိုင်ငံရှိ အွန်လိုင်းလိမ်လည်မှု ကွန်ရက်နှင့် ချိတ်ဆက်ထားသည့် အင်ဒိုနီးရှားရွှေ့ပြောင်းအလုပ်သမား ၆၉၉ ဦးပါဝင်သော နက်ရှိုင်းသော စုံစမ်းစစ်ဆေးမှုနှင့် အကဲဖြတ်မှုအပြီးတွင် ပြစ်မှုကျူးလွန်သူများအား ဖော်ထုတ်ခြင်းနှင့် သံသယဖြစ်ဖွယ်ရှိသူများစာရင်းကိုရဲ ဗိုလ်ချုပ်ကြီး Asep Hedi က ပြောကြားခဲ့သည်။
“လူကုန်ကူးမှု သံသယရှိသူ (TPPO) တစ်ဦးကိုစာရင်းသွင်းထားပါတယ်”ကျန်ငါးဦးဟာ လူသစ်စုဆောင်းသူများဟု သံသယရှိပါတယ်” ဟု Asep Hedi က မတ်လ ၂၂ ရက်က rri.co.id တွင် ဖော်ပြခဲ့သည်။

စုံစမ်းစစ်ဆေးခြင်းနှင့် အကဲဖြတ်ခြင်းအား မြန်မာနိုင်ငံမှ ရာနှင့်ချီသော အင်ဒိုနီးရှား ရွှေ့ပြောင်းအလုပ်သမားများ နေရပ်ပြန်ပို့ပြီးနောက်အသုတ် ၃ သုတ်ဖြင့် ဆောင်ရွက်ခဲ့ကြောင်း Asep မှ ပြောကြားခဲ့ပါသည်။ ယင်းနောက် ၎င်းတို့အား ဂျကာတာအရှေ့ဘက်ရှိ Pondok Gede Hajj အိပ်ဆောင်တွင် ခေတ္တတည်းခိုစေခဲ့သည်။ “အကဲဖြတ်မှုကို သုံးရက်ကြာ ပြုလုပ်ခဲ့ပါသည်။ သားကောင်ဖြစ်ခဲ့သူအင်ဒိုနီးရှား ရွှေ့ပြောင်း အလုပ်သမားများကို ၎င်းတို့၏ မူလနေရာဒေသများသို့ ပြန်လည်ပို့ဆောင်ပြီးပြီဖြစ်ကြောင်း Asep မှ ပြောကြားခဲ့သည်။

Bareskrim POLRI ၏ အမျိုးသမီးနှင့် ကလေးသူငယ် ကာကွယ်စောင့်ရှောက်ရေး ဒါရိုက်တာ (PPA) နှင့် လူကုန်ကူးမှုတိုက်ဖျက်ရေးဌာနမှ (PPO)၊ ဗိုလ်မှူးချုပ် Nurul Azizah,က အတိုကောက်အမည် HR (27) ဖြင့် သံသယရှိသူအဖြစ် သတ်မှတ်ခံရသော အင်ဒိုနီးရှား ရွှေ့ပြောင်းအလုပ်သမားသည် ပုဂ္ဂလိက ဝန်ထမ်းတစ်ဦးဖြစ်ပြီး နေရပ်ပြန်ပို့ခံရသူတစ်ဦးလည်းဖြစ်ကာလူသစ်စုဆောင်းသူအဖြစ် သံသယဖြင့် ပြင်းထန်စွာ သံသယရှိကြောင်းသူက ပြောကြားခဲ့သည်။

ထိုင်းနိုင်ငံတွင် ဝန်ဆောင်မှုလုပ်ငန်းများတွင်လုပ်ကိုင်ရမည်ဟု HR က ဒုက္ခသည်များကို ကတိပေးခဲ့ကြောင်း Nurul က ပြောကြားခဲ့သည်။ သို့သော်လည်း ၎င်းတို့သည် မြန်မာနိုင်ငံ မြဝတီမြို့ ပဋိပက္ခဇုန်သို့ လူကုန်ကူးခြင်းခံရကာ အွန်လိုင်း လိမ်လည်အော်ပရေတာများအဖြစ် လုပ်ကိုင်ရန် အတင်းအကြပ် ဖိအားပေးခံခဲ့ရသည်။ “သူအသုံးပြုတဲ့ modus operandi က ဆိုရှယ်မီဒီယာကနေတဆင့် ဇိမ်ခံပစ္စည်းတွေနဲ့ လစာမြင့်မားတဲ့ အလုပ်အကိုင်တွေကို ကတိပေးပါတယ်။ တကယ်တော့ သူတို့က အွန်လိုင်းမှာ လိမ်လည်မှုကျူးလွန်သူတွေအဖြစ်သာလုပ်ခဲ့ကြရပြီး ကတိပေးထားတဲ့အတိုင်း မလုပ်ခဲ့ကြရပါဘူး” ဟု Nurul က ပြောကြားခဲ့သည်။

အကဲဖြတ်မှုရလဒ်များအရ လိမ်လည်လှည့်ဖြားခံရသူများအား Facebook၊ Instagram နှင့် Telegram ကဲ့သို့သော ပလပ်ဖောင်းများမှတစ်ဆင့် ခေါ်ယူခဲ့ပြီး ရူပီးယား ၁၀သန်းမှ ၁၅ သန်းအထိ လစာများပေးမည်ဟု ကတိပြုထားကြောင်း သူမက ထုတ်ဖော်ပြောကြားခဲ့သည်။ လူသစ်စုဆောင်းသူများသည် ၎င်းတို့၏သားကောင်များအတွက် လက်မှတ်များနှင့် ခရီးစရိတ်များကိုလည်းကျခံခဲ့သည်ဟုဆိုသည်။ သို့သော်လည်း ယင်းတို့က မြန်မာနိုင်ငံသို့ ရောက်ရှိသည့်အခါတွင် ကျူးလွန်ခံရသူများသည် အလားအလာရှိသော အွန်လိုင်းလိမ်လည်မှုပစ်မှတ်များ၏ ဖုန်းနံပါတ်များကို စုဆောင်းပေးရခြင်းဖြင့် ခွဲတမ်းများပြည့်မီရန် တာဝန်ပေးခံခဲ့သည်။

အဆိုပါ ခွဲတမ်းများမပြည့်မီပါက နှုတ်နှင့် ရုပ်ပိုင်းဆိုင်ရာ စော်ကားမှုများအပြင် လစာ နုတ်ယူမှုများလည်း ဖြစ်ပေါ်ခဲ့သည်။ “ပြန်ပို့ခံရသူ ၆၉၉ ဦးအနက် ၁၁၆ ဦးသည် အွန်လိုင်းလိမ်လည်မှုများတွင် ထပ်ခါတလဲလဲ လုပ်ဆောင်ခဲ့သည်ကို တွေ့ရှိခဲ့သည်။ အကဲဖြတ်မှုရလဒ်များအရ အမည်ဝှက်များပေးထားသည့် BR၊ EL၊AW၊ RI၊ HR နှင့် HRR တို့ကို ဆက်လက်စုံစမ်းနေဆဲဖြစ်သည်” ဟု သူမက ပြောကြားခဲ့သည်။

တရားခံ HR သည် လူကုန်ကူးမှု ဥပဒေ အမှတ် ၂၁/၂၀၀၇ ပုဒ်မ ၄ နှင့် အင်ဒိုနီးရှား ရွှေ့ပြောင်း အလုပ်သမားများ ကာကွယ်ရေး ဥပဒေ ပုဒ်မ ၈၁ နှင့် ၁၈/၂၀၁၇ တို့ဖြင့် တရားစွဲဆိုထားသည်။ ပြစ်ဒဏ်မှာ ထောင်ဒဏ် ၃ နှစ်မှ ၁၅ နှစ်အထိ အပါအဝင် ငွေဒဏ် ရူပီးယား သန်း ၆၀၀ (အမေရိကန်ဒေါ်လာ ၃၆၃၁၆) ပါဝင်သည်။