ငလျင်ဘေးသင့်ပြည်သူတွေကို ကူညီဖို့လာတဲ့ တရုတ်ကြက်ခြေနီအသင်းယာဉ်တန်းကို စစ်တပ်က ပစ်ခတ်

ဧပြီလ ၂၊ ၂၀၂၅။ သောင်ရင်းသတင်းလွှာ

နိုင်ငံတဝှမ်း ငလျင်ဘေးသင့်ပြည်သူတွေအတွက် အရေးပေါ်စားနပ်ရိက္ခာနဲ့ ဆေးဝါးတွေသယ်ဆောင်လာတဲ့ တရုတ်ကြက်ခြေနီအသင်းရဲ့ ယာဉ်၉စီးတန်းကိုစစ်အုပ်စုဘက်က ပစ်ခတ်တိုက်ခိုက်ခဲ့တယ်လို့ TNLAဘက်က သတင်းထုတ်ပြန်ထားပါတယ်။

မနေ့ ည၉နာရီ ၂၁မိနစ်အချိန်မှာ ငလျင်ဘေးအတွက် ကူညီထောက်ပံ့ရေးပစ္စည်းတွေတင်ဆောင်ပြီး တရုတ်နိုင်ငံကနေ မန္တလေးဘက်ဆင်းလာတဲ့ ကြက်ခြေနီအသင်းကား ၉စီးကို နောင်ချိုမြို့နယ်၊ အုမ္မတီးကျေးရွာအရောက်မှာ စစ်အုပ်စုတပ်ဘက်က အသင့်စောင့်ပစ်ခတ်ခဲ့တာလို့သိရပါတယ်။

“စခဘက်က တရုတ်ကြက်ခြေနီယာဉ်တန်းကိုပစ်တာ။ရှေ့ဆက်သွားလို့မရတော့ နောင်ချိုပြန်ဆုတ်ရတာ။ နှစ်ဖက်ကို အကြောင်းကြားပြီးသားပါ။ ငလျင်ဘေးအတွက် ကူညီကယ်ဆယ်ရေးပစ္စည်းတွေသယ်မယ်ပေါ့။ ဒါကိုစခဘက်က ပစ်သေးတယ်”လို့နောင်ချိုမြို့ခံတဦးကပြောပါတယ်။

ပစ်ခတ်ခံရလို့ မန္တလေးဘက် မဆင်းနိုင်တဲ့ ကြက်ခြေနီအသင်းကားတွေကို တအာင်းတပ်မတော် TNLAမှ ကာကွယ်စောင့်ရှောက်ပေးထားပြီး ငလျင်ဘေးသင့်ပြည်သူများအတွက် ထောက်ပံ့ရေးပစ္စည်းများကိုလည်း ဖြစ်တဲ့နည်းနဲ့ ငလျင်ဘေးသင့်ပြည်သူတွေထံ ကူညီပို့ဆောင်ပေးမယ်လို့သိရပါတယ်။

#သောင်ရင်းသတင်းလွှာ #နောင်ချို #ငလျင်ဘေး #တရုတ်ကြက်ခြေနီအသင်း #စကစ #ပစ်ခတ်