ဧပြီလ ၂၊ ၂၀၂၅။ သောင်ရင်းသတင်းလွှာ
မြန်မာစစ်အစိုးရခေါင်းဆောင် မင်းအောင်လှိုင်သည် ၆ ကြိမ်မြောက် BIMSTEC ထိပ်သီးအစည်းအဝေးကို လူကိုယ်တိုင်တက်ရောက်ခြင်းထက် အွန်လိုင်းတက်ရောက်ပါက ထိုင်းအစိုးရအတွက် ပိုကောင်းမည်ဟု Thammasat တက္ကသိုလ်မှ တွဲဖက်ပါမောက္ခ Dulyapak Preecharush က ပြောသည်ဟု Thai Enquirer သတင်းကဧပြီ ၂ရက်တွင်ဖော်ပြသည်။ မင်းအောင်လှိုင်၏ ထိုင်းနိုင်ငံ ခရီးစဉ်သည် မြန်မာနိုင်ငံ ရွေးကောက်ပွဲ မတိုင်မီ စစ်အစိုးရအတွက် နိုင်ငံတကာ အသိအမှတ်ပြုမှု ရရှိရန် ကြိုးပမ်းမှု အဖြစ် ရှုမြင်ခံရဖွယ် ရှိကြောင်း ၎င်းက ရှင်းပြသည်။
ထိပ်သီးအစည်းအဝေးသည် ဒေသတွင်း စီးပွားရေး ဆက်ဆံမှု ခိုင်မာစေရန် ရည်ရွယ်သော်လည်း Dulyapak ကဝန်ကြီးချုပ် Paetongtarn Shinawatra နှင့် သံတမန်ရေးအရ ဝေးကွာနေရန် အရေးကြီးကြောင်းအလေးပေး ပြောကြားခဲ့သည်။ အနီးကပ်ထိတွေ့ဆက်ဆံမှုသည် မြန်မာစစ်အစိုးရအား တိတ်တဆိတ်ထောက်ခံမှုဟု အဓိပ္ပာယ်ဖွင့်ဆိုနိုင်သည်ဟုသူကဆိုသည်။ ထိုင်းနှင့် မြန်မာကြား နီးကပ်သော ဆက်ဆံရေးသည် နှစ်နိုင်ငံ ဆက်ဆံရေးကို မြှင့်တင်ပေးနိုင်သော်လည်း မြန်မာစစ်တပ်ကို ဆန့်ကျင်သည့် နိုင်ငံများမှ ဝေဖန်မှုများ ထွက်ပေါ်လာနိုင်ကြောင်း Dulyapak က မှတ်ချက်ပြုခဲ့သည်။
BIMSTEC ထိပ်သီးအစည်းအဝေးသည် အရှေ့တောင်အာရှနှင့် တောင်အာရှကြား ပေါင်းကူးတံတားအဖြစ် ထိုင်းနိုင်ငံ၏ အခန်းကဏ္ဍကို အားကောင်းလာစေရန်နှင့် ၎င်း၏ အနောက်မျှော်မူဝါဒကို ပြန်လည်အသက်သွင်းရန် အတွက်အခွင့်အလမ်းတစ်ခု ပေးဆောင်ရန် အကြံပြုခဲ့သည်။ ယခုမူဝါဒက အိန္ဒိယ၏ အရှေ့မျှော်မူဝါဒကို ဖြည့်စွမ်းပေးနိုင်ပြီး ထိုင်းနှင့်အိန္ဒိယ၏ဆက်ဆံရေး တိုးမြှင့်ရာ၌မြန်မာ့ငြိမ်းချမ်းရေး လုပ်ငန်းစဉ်တွင်လည်းအရေးပါသည့် အခန်းကဏ္ဍမှပါဝင်နေသည်ဟုသူကဆိုသည်။
