တရုတ်ကြက်ခြေနီအကူအညီယာဥ်တန်းကို သေနတ်ပစ်ဖောက် သတိပေးခဲ့သည်ဟု စစ်ကောင်စီဝန်ခံ

ဧပြီ ၂၊ ၂၀၂၅။ သောင်ရင်းသတင်းလွှာ

ရှမ်းပြည်နယ်မြောက်ပိုင်း၊ နောင်ချိုမြို့နယ်၌တရုတ်ကြက်ခြေနီ အကူအညီယာဥ်တန်းအား မိုးပေါ် သို့သေနတ် ၃ ချက်ဖောက်၍ပစ်ခတ် သတိပေးခဲ့သည်ဟု စစ်ကောင်စီက ဝန်ခံပြောကြားသည်။ တရုတ်ကြက်ခြေနီ အကူအညီပေးရေးယာဥ်တန်းကို စစ်ကောင်စီတပ်က ဧပြီ ၁ရက်နေ့က ပစ်ခတ်ခဲ့သည်ဟုတအာင်းတပ်(TNLA)ရဲ့ ထုတ်ပြန်ပြောဆိုချက်ကို ဧပြီလ ၂ ရက်တွင်စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းကယခုကဲ့သို့ တုံ့ပြန်ပြောဆိုခြင်းဖြစ်သည်။

‘‘ဧပြီ ၁ ရက် ည ၉ နာရီခွဲလောက်မှာ နောင်ချိုဘက်ကနေပြီး ယာဥ်တန်းပေါ့။ ၉ စင်းလောက် ပါတယ်လို့ ပြောပါတယ်။ အုမ္မတီးရွာနားမှာ ကျွန်တော်တို့ တပ်မတော် လုံခြုံရေးအဖွဲ့ရှိပါတယ်။ တပ်မတော် လုံခြုံရေးအဖွဲ့အနေနဲ့ ဒီယာဥ်တန်းကို တွေ့တဲ့အခါမှာ တားဆီးပါတယ်။ မီတာ ၁၀၀ လောက်အကွာမှာတော့ မိုးပေါ်ထောင်ပြီး သေနတ် ၃ ချက် ပစ်ခတ်ခဲ့တယ်လို့ သိရပါတယ်။ ဒါနဲ့ နောင်ချိုဘက်ကို ပြန်သွားတာလို့ သိရပါတယ်။’’ လို့ ဗိုလ်ချုပ်ဇော်မင်းထွန်းက ပြောသည်။

နိုင်ငံတကာအကူအညီပေးရေးနှင့် ကူညီကယ်ဆယ်ရေးလုပ်ငန်းများထောက်ပံ့ရေးများလုပ်သည့်အခါ သက်ဆိုင်ရာ သံရုံး၊ စစ်သံရုံးတွေများမှဆက်သွယ်ဆောင်ရွက်ရသည်မျိုးဖြစ်သောကြောင့် အကြောင်းကြား ဆက်သွယ်ဖို့ ပြောထားသည်ဟု ယင်းကဆိုသည်။ တရုတ်၏ Blue Sky ကူညီ ကယ်ဆယ်ရေးအဖွဲ့သည် ပြီးခဲ့သည့်ရက်ပိုင်းကတရုတ် – မြန်မာနယ်စပ်မှ ‌နောင်ချို – ပြင်ဦးလွင်ကို ဖြတ်ပြီး မန္တလေးအထိ ဖြတ်သန်းနိုင်ခဲ့သည်ကို စစ်ကောင်စီပြောခွင့်ရက ကိုးကားပြောဆိုသည်။