မေလ ၁၉၊ ၂၀၂၅။ သောင်ရင်းသတင်းလွှာ
မေလ ၁၇ ရက်က ဘန်ကောက်မြို့ RCA နယ်မြေရှိ နာမည်ကြီး လမ်းဘေး အစားအသောက်ဈေးတွင် တရားမဝင် ဝင်ရောက်မှုနှင့် ပါမစ်မရှိဘဲ အလုပ်လုပ်ကိုင်မှုတို့ဖြင့် မြန်မာနိုင်ငံသား ငါးဦးကို ဖမ်းဆီးခဲ့သည်ဟု The Thaiger သတင်းကမေလ ၁၈ရက်တွင်ဖော်ပြသည်။ လူဝင်မှုကြီးကြပ်ရေး တာဝန်ရှိသူများသည် ၎င်းတို့၏ အလုပ်ရှင်များအား တရားစွဲဆိုရန် စုံစမ်းမှုများ တိုးချဲ့ဆောင်ရွက်လျက်ရှိသည်။ လူဝင်မှုကြီးကြပ်ရေး ဗျူရို ကော်မရှင်နာ ရဲချုပ် Phanumart Boonyaluck ၊ရဲမှူးချုပ် Prasath Khemprasert ၊လူဝင်မှုကြီးကြပ်ရေးဌာနခွဲ၁ အကြီးအကဲ ရဲမှူးကြီး Pholasit Sutthiaj နှင့်ဒုရဲမှူးကြီး Suriya Puangsombat တို့နှင့်အတူ မှုခင်းကြိုတင်ကာကွယ်ရေး အရှိန်အဟုန်မြှင့် ဆောင်ရွက်ရန် ညွှန်ကြားခဲ့သည်။ လူကုန်ကူးမှု၊ ပြည့်တန်ဆာနှင့် အဓမ္မလုပ်အားပေးခိုင်းစေမှု အထူးသဖြင့် လမ်းဘေးအစားအစာဈေးကွက်များတွင် နိုင်ငံခြားသားများပါ၀င်ပတ်သက်မှုအပေါ် အဓိကအာရုံစိုက် သည်။
Rama 9 ဧရိယာတွင် စစ်ဆေးနေစဉ်အတွင်း တရုတ်ဘာသာစကား ဆိုင်းဘုတ်ပါသော လုပ်ငန်းများသည် တရုတ်နိုင်ငံသား ပိုင်ဆိုင်ခြင်းသို့မဟုတ် တရားမဝင် အလုပ်အကိုင်များဖြစ်နိုင်ခြေရှိသည်ကိုတွေ့ရှိခဲ့သည်။ သို့သော်လည်း တရုတ်နိုင်ငံသားများကို မတွေ့ခဲ့ရပေ။ ယင်းအစား မြန်မာနိုင်ငံသားငါးဦးသည် နိုင်ငံကူးလက်မှတ်မရှိဘဲ တရားမဝင် ဝင်ရောက်လုပ်ကိုင်နေကြောင်း တွေ့ရှိခဲ့သည်။ ဖမ်းဆီးခံထားရသည့် အလုပ်သမားများသည် တရားမ၀င် ဝင်ရောက်မှုနှင့် ခွင့်ပြုချက်မရှိဘဲ အလုပ်လုပ်ခြင်းအတွက် စွဲချက်တင်ခံရသည်။ လိုအပ်သည့် အလုပ်ပါမစ်မပါဘဲ နိုင်ငံခြားသား အလုပ်သမားများကို ငှားရမ်းသည့် အလုပ်ရှင်များကိုလည်း ရဲတပ်ဖွဲ့က အရေးယူရန် ဆောင်ရွက်နေကြောင်း KhaoSod က သတင်းဖော်ပြသည်။
