ဩဂုတ်လ ၁၅၊ ၂၀၂၅ ။ သောင်ရင်းသတင်းလွှာ
တရုတ်နိုင်ငံခြားရေးဝန်ကြီး ဝမ်ယီက မြန်မာနိုင်ငံ နိုင်ငံခြားရေး ဝန်ကြီးဌာန ပြည်ထောင်စုဝန်ကြီး ဦးသန်းဆွေနဲ့ ယူနန်ပြည်နယ် အန်းမြို့မှာသြဂုတ် ၁၄ရက်နေ့က တွေ့ဆုံခဲ့တယ်လို့ CGTN News ကသြဂုတ် ၁၅ရက်မှာဖော်ပြပါတယ်။ တရုတ်ကွန်မြူနစ်ပါတီ ဗဟိုကော်မတီ နိုင်ငံရေးဗျူရိုအဖွဲ့ဝင်လည်းဖြစ်တဲ့ ဝမ်က ဒီနှစ်ဟာ တရုတ်-မြန်မာ သံတမန်ဆက်ဆံရေး ၇၅ နှစ်မြောက် နှစ်ပတ်လည်နေ့ဖြစ်ပြီး နှစ်ဖက်စလုံးက တရုတ်-မြန်မာ အသိုက်အဝန်းကို နက်နက်ရှိုင်းရှိုင်း တည်ဆောက်ပြီး သူတို့ရဲ့ သက်ဆိုင်ရာ ဖွံ့ဖြိုးတိုးတက်ရေးနဲ့ ပြန်လည်နုပျိုလာစေဖို့ ဒီအခွင့်အရေးကို ယူသင့်တယ်လို့ ပြောပါတယ်။ ၎င်းရဲ့အမျိုးသားအခြေအနေနဲ့ ကိုက်ညီတဲ့ဖွံ့ဖြိုးတိုးတက်ရေးလမ်းကြောင်းကို လျှောက်လှမ်းရာမှာ တရုတ်နိုင်ငံက မြန်မာနိုင်ငံကို ထောက်ခံပြီး ၎င်းရဲ့ အချုပ်အခြာအာဏာ၊ လွတ်လပ်ရေးနဲ့ အမျိုးသားစည်းလုံးညီညွတ်ရေးကို ကာကွယ်ရာမှာမြန်မာနိုင်ငံကိုထောက်ခံကြောင်း ၎င်းက ပြောကြားခဲ့ပါတယ်။
တရုတ်နိုင်ငံရဲ့ ဝန်ထမ်းများ၊ အဖွဲ့အစည်းများနဲ့ပရောဂျက်များရဲ့ လုံခြုံရေးကို မြန်မာနိုင်ငံကနေ စိတ်ချယုံကြည်စွာ အာမခံနိုင်စေဖို့ နယ်စပ်ဖြတ်ကျော် ရာဇ၀တ်မှုတွေကို ထပ်မံနှိမ်နင်းဖို့နဲ့တရုတ်-မြန်မာ နယ်စပ်တလျှောက် တည်ငြိမ်အေးချမ်းရေး ထိန်းသိမ်းနိုင်မယ်လို့ မျှော်လင့်ကြောင်း ဝမ်က ပြောကြားခဲ့ပါတယ်။ တရုတ်နိုင်ငံ လန်ချန်း-မဲခေါင် ပူးပေါင်းဆောင်ရွက်ရေး (LMC) ရဲ့ ဆယ်ကြိမ်မြောက် နိုင်ငံခြားရေး ဝန်ကြီးများ အစည်းအဝေးကို တက်ရောက်ခဲ့တဲ့ မြန်မာနိုင်ငံခြားရေးဝန်ကြီး ဦးသန်းဆွေက မြန်မာနိုင်ငံဟာ တရုတ်တစ်နိုင်ငံတည်း မူဝါဒကို အခိုင်အမာ လိုက်နာကြောင်း၊ တရုတ်နိုင်ငံရဲ့ ကမ္ဘာလုံးဆိုင်ရာ ကြိုးပမ်းမှု (၃)ရပ်ကို ပံ့ပိုးပေးပြီး မြန်မာ့စီးပွားရေးနှင့် လူမှုရေး ဖွံ့ဖြိုးတိုးတက်ရေးနဲ့ သဘာဝဘေးအန္တရာယ် အပြီး ပြန်လည်တည်ဆောက်ရေးတို့အတွက် အဖိုးတန်တဲ့ ပံ့ပိုးကူညီမှုများ ပေးအပ်တဲ့အတွက် တရုတ်နိုင်ငံကို ကျေးဇူးတင်ရှိကြောင်း ပြောကြားခဲ့ပါတယ်။
