စက်တင်ဘာ ၉၊ ၂၀၂၅။ သောင်ရင်းသတင်းလွှာ
ရန်ကုန်တိုင်းဒေသကြီး သာကေတမြို့နယ်ရှိ နတ်မောက် ဘုန်းတော်ကြီးသင်း ပညာရေးကျောင်းမှာ နေထိုင်တဲ့ အသက် ၂၆ နှစ်အရွယ် မောင်ရွှေကပ် (“ဝ” လူငယ်) ဆိုသူဟာ ကွမ်းယာထွက်ဝယ်ချိန်အတွင်း အမည်မသိ လူတစ်စုရဲ့ အတင်းအဓမ္မ ကားနဲ့ဖမ်းဆီးခေါ်ဆောင်တာ ခံခဲ့ရတယ်လို့ နီးစပ်သူတွေကပြောတယ်လို့ Wa News Lsnd သတင်းကစက်တင်ဘာ ၉ ရက်မှာဖော်ပြပါတယ်။
ပြီးခဲ့တဲ့ စက်တင်ဘာလ ၇ ရက်၊ တနဂ်နွေနေ့ ညဘက် ၉ : ၂၇ မိနစ်အချိန်မှာ ကွမ်းယာဝယ်ဖို့ထွက်သွားခဲ့ကာ သုခ ( 5star ကားမှတ်တိုင်အနီး)မှာ ကားအမဲရောင်နဲ့အမည်မသိလူ (၅) ယောက်က အတင်းအဓမ္မခေါ်ဆောင်သွားခဲ့ပြီး ယခုအချိန်ထိ အဆက်အသွယ်မရရှိသေးကြောင်း သိရှိရပါတယ်။
မိဘဆွေမျိုးများနဲ့ နီးစပ်သူတွေက စိုးရိမ်နေရပြီး တွေ့ရှိပါက (ဆက်သွယ်ရန် ဖုန်း – 09660059533၊ လိပ်စာ – သာကေတမြို့နယ် နတ်မောက်ဘုန်းတော်ကြီးသင်ပညာရေးကျောင်း) သို့အကြောင်းကြား ဆက်သွယ်ပေးကြဖို့ မေတ္တာရပ်ခံထားပါတယ်။
လက်ရှိရန်ကုန်မြို့မှာ စစ်ကောင်စီတပ်က လူငယ်တွေကို နေ့ခင်း၊ ညဘက်အချိန်မရွေး ပေါ်တာဆွဲ ခေါ်ယူနေတဲ့ဖြစ်စဥ်တွေ မကြာမခဏဆိုသလို ဖြစ်ပွားနေပြီး တစ်ချို့မှာ ငွေသိန်း၊ ဆယ်ချီပေးကာ ပြန်ရွေးယူရတယ်လို့ မြေပြင်သတင်းအရင်းအမြစ်တွေက ပြောပါတယ်။
