အွန်လိုင်းလိမ်လည်မှုများကို တိုက်ဖျက်ရန် တာ့ခ်ခရိုင်အား အထူးဇုန်အဖြစ် သတ်မှတ်လိုက်

မတ်လ ၁၄၊၂၀၂၅။ သောင်ရင်းသတင်းလွှာ

ထိုင်းတပ်မတော်ကာကွယ်ရေးဦးစီးချုပ် ဗိုလ်ချုပ်ကြီး Songwit Noonpackde က သူသည် တိုးလာနေသော အွန်လိုင်းလိမ်လည်မှုပြဿနာကို ဖြေရှင်းရန်အတွက် တာ့ခ်ခရိုင်ရှိ မြို့နယ်ငါးခုကို အထူးဇုန်အဖြစ် ကြေညာရန် အမျိုးသားလုံခြုံရေးကောင်စီ (NSC) ကို တောင်းဆိုရန် စီစဉ်ထားကြောင်း မတ်လ ၁၃ ရက် နေ့တွင် ထုတ်ဖော်ပြောကြားခဲ့သည်ဟု The Nation သတင်းက ဖော်ပြသည်။

နယ်စပ်ဒေသ လုံခြုံရေး ခြိမ်းခြောက်မှု တားဆီးနှိမ်နင်းရေး ဗဟို ဒါရိုက်တာလည်းဖြစ်သူ Songwit က မြန်မာနိုင်ငံရှိ ရွှေကုက္ကိုနှင့် KK Park တို့မှ နိုင်ငံခြားသားများ နေရပ်ပြန်ရေး စင်တာတွင် ဆွေးနွေးနေသည်ဟု ဆိုသည်။ လူပေါင်း ၃၀၀၀ ကျော်ကိုနေရပ်သို့ပြန်ပို့ပြီးသော်လည်းမြဝတီမြို့နယ်အတွင်း နှောင့်နှေးကြန့်ကြာမှုများ​ဖြစ်ပေါ်နေကြောင်း ၎င်းက ပြောသည်။ နေရပ်ပြန်ပို့မှုသည် တစ်ရက်လျှင် လူ ၅၀၀ နှုန်းဖြင့်ပို့နိုင်သော်လည်း ၎င်းတို့၏ မိခင်နိုင်ငံသို့ ပြန်ရန် စောင့်ဆိုင်းနေသူ ၄,၀၀၀ ခန့် ကျန်ရှိနေသေးကြောင်း ၎င်းက ရှင်းပြသည်။

အကူအညီ စောင့်ဆိုင်းနေသော အာဖရိကနိုင်ငံသားများ နေရပ်ပြန်ရေးနှင့် ပတ်သက်ပြီးထိုင်းနိုင်ငံက သက်ဆိုင်ရာ အေဂျင်စီများနှင့်ဆွေးနွေးနေသည်ဟု ၎င်းကဆိုသည်။ တရားမ၀င် နယ်စပ်ဖြတ်ကျော်မှုများကို ကိုင်တွယ်ဖြေရှင်းရေး ဗဟိုဌာနက လုပ်ဆောင်နေကြောင်း Songwit မှ မီးမောင်းထိုးပြခဲ့သည်။ နရဲစွမ်အထူးတပ်ဖွဲ့၊ ရဲတပ်ဖွဲ့နှင့် လုံခြုံရေး အရာရှိများသည် ထိုင်းနိုင်ငံအတွင်း တရားမဝင် ဝင်ရောက်ရန် ကြိုးပမ်းသူ အများအပြားကို ဖမ်းဆီးနိုင်ခဲ့ကြောင်း သိရသည်။ ထိုကဲ့သို့သော လှုပ်ရှားမှုများကို တားဆီးရန် ပိုမိုပြင်းထန်သော အစီအမံများ လိုအပ်ကြောင်း ၎င်းက အလေးထား ပြောကြားခဲ့သည်။

လူဝင်မှုကြီးကြပ်ရေးဗျူရိုနှင့် ဒေသဆိုင်ရာ အာဏာပိုင်များက တာ့ခ်ခရိုင်ရှိ မြို့နယ်ငါးခုကို အထူးဒေသအဖြစ် သတ်မှတ်ရန် အဆိုပြုထားသည်ဟုလည်း ၎င်းက ဆိုသည်။ အဆိုပြုထားသောကြေညာချက်သည် တိကျသောရည်ရွယ်ချက်မရှိဘဲ ခရီးသွားနေသူများကို ပစ်မှတ်ထားပြီး သင့်လျော်သော ခရီးသွားစာရွက်စာတမ်းမရှိခြင်း၊ သို့မဟုတ် စာရွက်စာတမ်းအတုပြုလုပ်ခြင်း သို့မဟုတ် လုံလောက်မှုမရှိကြောင်းစသည်တို့ကိုသာစစ်ဆေးနိုင်ကြောင်း ၎င်းက ရှင်းပြသည်။ “ဒီလူအုပ်စုက ထိုင်းနိုင်ငံကို တရားဝင် ဝင်လာပေမယ့် ဗီဇာသက်တမ်း လွန်နေလေ့ရှိတယ်” ဟု သူကပြောပြီးနိုင်ငံခြားရေး ဝန်ကြီးဌာနမှ သက်ဆိုင်ရာ သံရုံးများနှင့် ဆွေးနွေးသင့်သည်ဟု ၎င်းကဆက် ဆိုသည်။

အဆိုပြုထားသည့် အထူးဇုန်သည် အပျက်သဘောဆောင်သည့် စီးပွားရေးဆိုင်ရာ ထိခိုက်မှုမှန်သမျှကို လျှော့ချရန်အတွက် ယာယီအခြေခံဖြင့် အကောင်အထည်ဖော်သွားမည်ဖြစ်ပြီး၊ ယခင်အစီအစဥ်များနှင့် လိုက်လျောညီထွေဖြစ်စေမည့် မူဘောင်ကို Covid-19 ပျံ့နှံ့မှုကို ထိန်းချုပ်ရန် ဒီဇိုင်းထုတ်ထားသည်ဟုသူကဆက်ပြောသည်။NSC အဆိုပြုချက်ကို အတည်ပြုပါက အထူးဧရိယာ​ကြေညာချက်ကို ရှင်းလင်းပြတ်သားစွာ လမ်းညွှန်ချက်နှင့် သတ်မှတ်ရန်အချိန်ကိုမူဘောင်ဖြင့် ကျင့်သုံးမည်ဖြစ်ကြောင်း Songwit မှ ပြောကြားခဲ့သည်။ အစီအမံအသစ်များကိုအကောင်အထည်ဖော်ရန် ပျက်ကွက်ပါက ဒေသဆိုင်ရာ အရာရှိများအတွက် နောက်ထပ် ဝန်ထုပ်ဝန်ပိုး ဖြစ်စေကြောင်း ၎င်းက သတိပေးသည်။

အီလက်ထရွန်နစ် ကိရိယာများနှင့် ဂြိုလ်တု စလောင်းများ ကဲ့သို့သော ခေါ်ဆိုရေးစင်တာ လုပ်ငန်းများတွင် အသုံးပြုသည့် ကုန်ပစ္စည်းများနှင့် ပတ်သက်၍ အကောက်ခွန်ရုံးနှင့် ဆွေးနွေးမှုများ ပြုလုပ်နေပြီး အဆိုပါ ပစ္စည်းများအား တားမြစ် ကုန်စည်အဖြစ် အမျိုးအစားခွဲရန် ဆက်လက် လုပ်ဆောင်နေကြောင်း ၎င်းက ပြောသည်။ NSC သည် အဆိုပါ အဆိုပြုချက်ကို ဆက်လက် သုံးသပ်သွားမည်ဖြစ်ကြောင်း ၎င်းက ဆက်လက်ပြောသည်။ အိမ်နီးချင်းနိုင်ငံများတွင် လျှပ်စစ်ဓာတ်အားသုံးစွဲမှု ကျဆင်းမှုကို ထင်ဟပ်နေသည့် ထိုင်းနိုင်ငံ၏ ဖြတ်တောက်မှုသည် ထိရောက်ကြောင်း Songwit မှ အတည်ပြုပြောကြားခဲ့သည်။

သို့သော်လည်း တင်းကျပ်သော နယ်စပ်ထိန်းချုပ်မှုနှင့် ကင်းလှည့်ခြင်းတို့သည် အထူးအရေးကြီးကြောင်း၊ အထူးသဖြင့် ဖုန်းခေါ်ဆိုမှုစင်တာလုပ်ငန်းများတွင် အသုံးပြုသည့် စက်ပစ္စည်းများ စီးဆင်းမှုကို တားဆီးရန် အရေးကြီးကြောင်း ၎င်းက အလေးပေးပြောကြားခဲ့သည်။ ညှိနှိုင်း ဆောင်ရွက်ရန် မဲဆောက်မြို့သို့ တာဝန်ရှိသူများ စေလွှတ်ရန် နိုင်ငံခြားရေး ၀န်ကြီးဌာနထံ ဆက်သွယ်ထားကြောင်း ၎င်းက ဆိုသည်။ အဆိုပါ အစီအမံများအားလုံးကို မတ်လ ၂၁ ရက်တွင် ဝန်ကြီးချုပ် Paetongtarn Shinawatraထံ အစီရင်ခံရန် စီစဉ်ထားပြီး အခြေအနေများအရ တင်းကြပ်သောအစီအမံများကို ဆက်လက်ထားရှိရန် ဝန်ကြီးချုပ် မှ ညွှန်ကြားထားကြောင်း Songwit က အတည်ပြုပြောကြားခဲ့သည်။