ထိုင်း-မြန်မာနယ်စပ်အနီးတွင် ထိုင်းစစ်တပ်နှင့် မူးယစ်ဆေးကုန်သည်အဖွဲ့တို့ ထိပ်တိုက်တွေ့

မတ်လ ၂၂၊ ၂၀၂၅။ သောင်ရင်းသတင်းလွှာ

Pha Muang တပ်ဖွဲ့၏ အလျင်အမြန် ဖြန့်ကျက်ထားသော စစ်ကြောင်းမှူးများ၊ မြောက်ပိုင်းနယ်စပ် မူးယစ်ဆေးဝါး တားဆီးနှိမ်နင်းရေး ကွပ်ကဲမှုဌာနချုပ် (NB.YS.35) နှင့် 3207th Ranger ကုမ္ပဏီတို့မှ မူးယစ်ဆေးဝါး ရောင်းဝယ်မှု တားဆီးနှိမ်နင်းရေး စစ်ဆင်ရေးကို မတ်လ ၂၀ရက်နေ့က ပြုလုပ်ခဲ့သည်ဟု The Nation သတင်းကမတ်လ၂၁ရက်တွင်ဖော်ပြသည်။

ချင်းမိုင်ခရိုင် မယ်အိုက်မြို့နယ်မယ်စော်မြို့ မှမယ်အိုက်နှင့် ပတ်လော်လမ်းကြောင်းကြား တောင်တန်းတောအုပ်တစ်ခုတွင် ညနေ ၇ နာရီခွဲခန့်တွင် ကင်းလှည့်နေစဉ် ထိုင်း-မြန်မာနယ်စပ်မှ ခုနစ်ကီလိုမီတာအကွာတွင် မူးယစ်ဆေးဝါး မှောင်ခို သယ်ဆောင်သူဟု သံသယရှိသူ ၇-၈ ဦးခန့်ကို တာဝန်ရှိသူများက တွေ့ရှိခဲ့သည်။ကျောပိုးအိတ်များ ကိုင်ဆောင်ကာ ခြေလျင်ခရီးထွက်နေသည့် အုပ်စုကို ချက်ချင်း စောင့်ကြည့်စစ်ဆေးခဲ့သည်ဟုသတင်းကဆိုသည်။တာဝန်ရှိသူများက သံသယရှိသူများအား ရပ်တန့်ရှာဖွေရန် အချက်ပြလိုက်သောအခါတွင် အဆိုပါအဖွဲ့မှ ထွက်ပြေးလွတ်မြောက်ရန် ကြိုးပမ်းရာတွင် အမည်မသိသေနတ်ဖြင့် ပစ်ခတ်ခဲ့သည်။

အရာရှိများက တုံ့ပြန်ခဲ့ရာတွင် တိုတောင်းသော်လည်း ပြင်းထန်စွာ ပစ်ခတ်မှု ဖြစ်ပွားခဲ့သည်။ ပစ်ခတ်မှုအပြီးတွင် 3207th Ranger ကုမ္ပဏီမှ တပ်ဖွဲ့ဝင်များအား ညဘက်တွင် အခင်းဖြစ်ပွားရာနေရာ ရှင်းလင်းရေးနှင့် နယ်မြေလုံခြုံရေးအတွက် ထပ်မံစေလွှတ်ခဲ့ပါသည်။ မတ်လ ၂၁ ရက် နံနက်အစောပိုင်းတွင် Pha Muang တပ်ဖွဲ့မှူး ဗိုလ်ချုပ် Kidakorn Chantra က အဆိုပါနေရာအား စေ့စေ့စပ်စပ်စုံစမ်းစစ်ဆေးရန်အမိန့်ပေးခဲ့ရာမှောင်ခိုပစ္စည်းများကိုသိမ်းဆည်းရမိခဲ့သည်။

နယ်မြေရှင်းလင်းရေးဆောင်ရွက်ရာတွင် အာဏာပိုင်များက မူးယစ်ဆေးဝါး ရောင်းဝယ်ဖောက်ကားသူနှစ်ဦး၏ ရုပ်အလောင်းများကို ရှာဖွေတွေ့ရှိခဲ့သည်။ ကျန်သံသယရှိသူများမှာ နယ်စပ်ဖြတ်ကျော်ပြီး မြန်မာနိုင်ငံအတွင်းသို့ ပြန်လည်ဆုတ်ခွာသွားသည်ဟု ယူဆရသည်။ ထပ်မံရှာဖွေရာတွင် စိတ်ကြွဆေးပြား ၂၈၀,၀၀၀ ခန့်နှင့် အလေးချိန် ၄.၈ ကီလိုဂရမ်ရှိသော ဘိန်းစိမ်း ၃ တုံးတို့ပါရှိသော ကျောပိုးအိတ်နှစ်လုံးကို ရရှိခဲ့သည်။

ထို့အပြင် တာဝန်ရှိသူများက အိမ်လုပ် ပြောင်းရှည်သေနတ်တစ်လက်၊ ရေဒီယိုဆက်သွယ်ရေးစက်တစ်ခုနှင့် လက်ကိုင်ဖုန်းတစ်လုံးတို့ကို သိမ်းဆည်းရမိခဲ့သည်။ သိမ်းဆည်းရမိသည့် ပစ္စည်းများအားလုံးကို မယ်အိုက်ရဲစခန်းမှ စုံစမ်းရေးမှူးထံ လွှဲပြောင်းပေးအပ်ခဲ့ကြောင်း သိရသည်။ အဆိုပါ စစ်ဆင်ရေးသည် မြောက်ပိုင်းနယ်စပ်တစ်လျှောက်တွင် လည်ပတ်နေသော နယ်စပ်ဖြတ်ကျော် မူးယစ်ဆေးဝါး ရောင်းဝယ်ဖောက်ကားမှုကွန်ရက်များကို တိုက်ဖျက်ရန် ထိုင်းလုံခြုံရေးတပ်ဖွဲ့များ၏ ကြိုးပမ်းအားထုတ်မှုဖြစ်သည်ဟုသတင်းကဆိုသည်။