MNDAA က သိန္နီမြို့တွင်း ဖမ်းဆီးရမိတဲ့ ကျားဖျန့်လုပ်ကိုင်သူ (၂၃) ဦးကို UWSA ဆီကိုလွှဲပြောင်း

ဩဂုတ်လ ၁၅၊ ၂၀၂၅။ သောင်ရင်းသတင်းလွှာ

ကိုးကန့်တပ် – MNDAA ထိန်းချုပ်နယ်မြေ သိန္နီမြိို့မှာ MNDAA က၎င်းဖမ်းဆီးရမိတဲ့ ကျားဖျန့်လုပ်ကိုင်သူ (၂၃) ဦးကို “ဝ” တပ် – UWSA ထံလွှဲပြောင်းပေးခဲ့တယ်လို့ “ဝ” လူငယ့်အသံရဲ့ မြေပြင်သတင်းအရင်းအမြစ်တွေက ပြောတယ်လို့ Wa News Land သတင်းကသြဂုတ် ၁၅ ရက်မှာဖော်ပြပါတယ်။

အဲ့ဒီကျားဖျန်လုပ်ကိုင်သူ (၂၃) ဦးကို ပြီးခဲ့တဲ့ သြဂုတ်လ ၁၂ ရက်နေ့ ညနေပိုင်းက ဟိုပန်မြို့ – ဖောင်ဆိပ်တံတားကတဆင့် “ဝ” တပ် – UWSA ထံလွှဲပြောင်းပေးခဲ့တာ ဖြစ်တယ်လို့ အမည်မဖော်လိုတဲ့ မြေပြင်သတင်းအရင်းအမြစ်က ဆိုပါတယ်။

“သိန္နီ ကဖမ်းဆီးရမိတဲ့ ကျားဖျန့်တွေလို့ သိရပါတယ်။ သက်ဆိုင်ရာ ကိုးကန့်တပ်ရဲ့ ရဲဌာနနဲ့ “ဝ” ဘက်က ရဲဌာနတွေ ဟိုပန် – ဖောင်ဆိပ်တံတားမှာ လွှဲပြောင်းခဲ့ကြတာတွေ့ရတယ်။ အဲ့ဒီ ၂၃ ဦးက “ဝ” ဒေသမှာ နေထိုင်ကြတဲ့သူတွေမို့ “ဝ” ကို ပြန်လွှဲပေးတာတဲ့”လို့သူကဆက်ပြောပါတယ်။

ကိုးကန့်တပ် – MNDAA ရဲ့ “ဝ” တပ် – UWSA ထံကျားဖျန် (၂၃) ဦး လွှဲပြောင်းတဲ့အပေါ် ဟိုပန်ခရိုင် “ဝ” ပြည်သူ့အစိုးရ သတင်းနဲ့ ပြန်ကြားရေးဌာနမှ တာဝန်ခံက “လွှဲပြောင်းပေးခဲ့တာ ဟုတ်ပါတယ်။

တရုတ်ပြည်ကို အကုန်ပြန်လွှဲပြောင်းပေးလိုက်ပါပြီ။ နမ့်တစ် – မန်ခါ နယ်စပ်ဂိတ်ကတဆင့် လွှဲပြောင်းခဲ့တာဖြစ်ပါတယ်” လို့ “ဝ” လူငယ့်ကို ပြောပါတယ်။

“ဝ” လူငယ့်အသံရဲ့ နောက်ဆုံးပြုစုထားတဲ့ စာရင်းအချက်အလက်အရ ၂၀၂၅ ခုနှစ် ဇန်နဝါရီလကနေ သြဂုတ်လ ပထမပတ်ထိ “ဝ” တပ် – UWSA မှ တရုတ်ထံ ဖမ်းဆီးရမိတဲ့ ကျားဖျန့် အကြိမ်ရေ (၁၁) ကြိမ်တိတိလွှဲပြောင်းခဲ့ပြီး စုစုပေါင်း လူဦးရေ အယောက် သုံးရာကျော်ပါဝင်ပါတယ်။