ဇူလိုင်လ ၁၄၊ ၂၀၂၅။ သောင်ရင်းသတင်းလွှာ
မြန်မာစစ်တပ်၏အခြေစိုက်စခန်းတခုကို တိုင်းရင်းသား တိုက်ခိုက်ရေးသမားများ၏ချေမှုန်းမှုအပြီး ဇူလိုင် ၁၂ရက်နေ့က ဖြစ်ပွားခဲ့သည့် ပဋိပက္ခများကြောင့် အရပ်သားနှင့်စစ်သား ၅၀၀ ကျော် ထိုင်းနိုင်ငံကို ဖြတ်ကျော် ထွက်ပြေးခဲ့သည်ဟု ထိုင်းစစ်တပ်က ပြောကြောင်း The Laotian Times သတင်းကဇူလိုင် ၁၄ရက်တွင်ဖော်ပြသည်။ မြန်မာနိုင်ငံသည် ၂၀၂၁ ခုနှစ် စစ်တပ်က အာဏာသိမ်းပြီးကတည်းက ပြည်တွင်းပဋိပက္ခတွင် နစ်မြုပ်နေခဲ့ပြီး စစ်အစိုးရသည် တိုင်းရင်းသား လက်နက်ကိုင်အဖွဲ့များ၊ဒီမိုကရေစီ လိုလားသော တော်လှန်ရေးအင်အားစုများနှင့် မဟာမိတ်အဖွဲ့များနှင့် တိုက်ပွဲများ ဖြစ်ပွားနေခဲ့သည်။ ကရင်အမျိုးသားလွတ်မြောက်ရေးတပ်မတော် (KNLA) မှ ဇူလိုင်လ ၁၂ ရက်နေ့ ဒေသစံတော်ချိန် ညနေ ၃ နာရီ ဝန်းကျင်တွင် ကရင်ပြည်နယ်ရှိ စစ်စခန်းတစ်ခုကို ပစ်မှတ်ထားတိုက်ခိုက်ခဲ့ကြောင်း ထိုင်းစစ်တပ်က ထုတ်ပြန်သည်။ “မြန်မာစစ်သားတွေက သူတို့ရဲ့စခန်းကို ခုခံကာကွယ်ဖို့ လက်နက်အင်အား ပံ့ပိုးပေးဖို့ တောင်းဆိုကြိုးပမ်းခဲ့ပေမယ့် နောက်ဆုံးမှာတော့ ထိန်းမနိုင်သိမ်းမနိုင်ဖြစ်ခဲ့တယ်” ဟု ၎င်းကဆိုသည်။ မြန်မာစစ်သား ၁၀၀နှင့် အရပ်သား ၄၆၇ ဦးတို့သည် ထိုင်းနိုင်ငံအတွင်းသို့ ဇူလိုင် ၁၂ရက်နေ့က ဖြတ်ကျော်ဝင်ရောက်ခဲ့ပြီး ထိုင်းစစ်တပ်နှင့် ရဲများက ၎င်းတို့အား လက်နက်ဖြုတ်သိမ်းကာ ကုသရေးနှင့် လူသားချင်းစာနာမှုဆိုင်ရာ အကူအညီများ ပေးအပ်ခဲ့ကြောင်း တာဝန်ရှိသူများက ပြောသည်။
နိုင်ငံခြား လက်နက်ကိုင် တပ်ဖွဲ့များ၏ အချုပ်အခြာအာဏာကို ချိုးဖောက်ခြင်းဟု အရာရှိများက သတ်မှတ်သည့် အလားအလာကို တားဆီးရန် ထိုင်းစစ်တပ်သည် အနောက်ဘက် တာ့ခရိုင်ရှိ နယ်စပ်တလျှောက် ကင်းလှည့်မှုများကို အရှိန်မြှင့် လုပ်ဆောင်ခဲ့သည်။ KNLA ၏ နိုင်ငံရေးအဖွဲ့ခေါင်းဆောင် စောသမိန်ထွန်းက နယ်စပ်အနီးတွင် တိုက်ပွဲများဖြစ်ပွားနေကြောင်း အတည်ပြုခဲ့ပြီး ပူးပေါင်းတပ်ဖွဲ့များသည် မြန်မာစစ်တပ်မှ ရှေ့တန်းစခန်းအချို့ကို သိမ်းယူခဲ့ကြောင်း ပြောကြားခဲ့သည်။ “တချို့ (မြန်မာတပ်တွေ) က ကျနော်တို့ရဲ့ ပူးပေါင်းတပ်တွေဆီဘက်ပြောင်းလာပေမယ့် တချို့က ထိုင်းဘက်ကို ထွက်ပြေးသွားတယ်” ဟု ၎င်းက AFP သို့ ပြောသည်။ ကရင် တိုင်းရင်းသား လက်နက်ကိုင် အဖွဲ့များသည် စစ်တပ်ကို ကာလရှည်ကြာ စိန်ခေါ်ခဲ့ပြီး ယခုအခါ နယ်စပ်ဒေသများတွင် စစ်အစိုးရ ထိန်းချုပ်မှုကို တွန်းလှန်ရာတွင် အဓိက အခန်းကဏ္ဍမှ ပါဝင်နေပါသည်။ မြန်မာနိုင်ငံ၏ ပြည်တွင်းစစ်ကြောင့် ထိုင်းနိုင်ငံတွင် လက်ရှိနေထိုင်နေသော ဒုက္ခသည် သို့မဟုတ် ခိုလှုံခွင့်ရှာဖွေသူ ၈၁,၀၀၀ ရှိပြီး လူဦးရေ အများအပြား အိုးမဲ့အိမ်မဲ့ဖြစ်ခဲ့ရကြောင်း ကုလသမဂ္ဂ၏ ကိန်းဂဏန်းများအရ သိရသည်။ KNLA သည် မြန်မာနိုင်ငံအရှေ့တောင်ဘက်ခြမ်းတစ်လျှောက်နေထိုင်သော ကရင်လူမျိုးများအတွက် ပိုမိုကောင်းမွန်သော ကိုယ်ပိုင်အုပ်ချုပ်ခွင့်ရရှိရန် ဆယ်စုနှစ်များစွာ တိုက်ပွဲဝင်နေခဲ့သည်။
