စက်တင်ဘာ ၂၅၊ ၂၀၂၅။ သောင်ရင်းသတင်းလွှာ
ထိုင်း- မြန်မာနယ်စပ်၊ ကရင်ပြည်နယ်၊ မြဝတီမြို့နယ်တောင်ပိုင်းမှာဖြစ်နေတဲ့တိုက်ပွဲတွေကနေ လက်နက်ကြီးကျည်အချို့ဟာ ထိုင်းနိုင်ငံ၊ မဲဆောက်မြို့နယ်၊ မယ်တော်ကျေးရွာနားကို ကျရောက်ခဲ့တယ်လို့ ထိုင်းသတင်းဌာနတွေက ရေးသား ဖော်ပြတယ်လို့ BBC သတင်းကဖော်ပြပါတယ်။ စစ်တပ်နဲ့ တိုင်းရင်းသား လက်နက်ကိုင်တွေကြား တိုက်ပွဲဖြစ်နေပြီး ဘယ်အဖွဲ့က ပစ်လိုက်မှန်းမသိတဲ့ လက်နက်ကြီးတချို့ဟာ နယ်စပ်နေရာကနေ ၆ ကီလိုမီတာအကွာကို ကျရောက်ခဲ့တယ်လို့ Thai PBS သတင်းဌာနက ရေးပါတယ်။ လက်နက်ကြီးတွေ ကျရောက်ပေမဲ့ ပေါက်ကွဲမှု ရှိ မရှိကို မသိရသေးပေမဲ့ ထိုင်းနိုင်ငံသားတွေကို ထိခိုက်တာ မရှိပါဘူး။ လက်နက်ကြီးကျတာတွေကြောင့် ထိုင်းစစ်တပ်က မြန်မာနိုင်ငံကို တရားဝင် စာပို့ထားပြီးဖြစ်သလို စစ်ဆေးရေးအဖွဲ့တွေ ၂၄ နာရီ တိုးချဲ့ဖြန့်ကြက်ထားတယ်လို့လည်း ရေးသားထားပါတယ်။ မြန်မာ လက်နက်ကျည် ထိုင်းဘက်ကို ကျရောက်ခဲ့တယ်ဆိုတဲ့သတင်းနဲ့ပတ်သက်ပြီး ဘီဘီစီက စစ်ကော်မရှင် သတင်းထုတ်ပြန်ရေးအဖွဲ့ဆီ ဆက်သွယ်မေးမြန်းဖို့ ကြိုးစားနေပါတယ်။ ကရင်အမျိုးသားလွတ်မြောက်ရေးတပ်(KNLA) ဦးဆောင်တဲ့ ပူးပေါင်းတပ်တွေ ထိန်းချုပ်ထားတဲ့ လေးကေ့ကော်၊ စွယ်တော်ကုန်း၊ ထီးမယ်ဝါးခီးရွာက စခန်းတွေကို စစ်တပ်က ပြန်သိမ်းပိုက်ဖို့ စက်တင်ဘာ ၂၁ ရက်စပြီး ထိုးစစ်ဆင်လာတယ်လို့ စစ်ရေးအရင်းအမြစ်က ပြောပါတယ်။
ဒီနေ့ စက်တင်ဘာ ၂၅ ရက်အထိလည်း တိုက်ပွဲတွေ ဆက်ရှိနေပြီး ထိုင်းဘက်ကို ကျရောက်တဲ့ လက်နက်ကြီးကျည်ဟာ လေးကေ့ကော်တိုက်ပွဲကနေ ပစ်ခတ်လိုက်တဲ့ကျည်ဖြစ်နိုင်တယ်လို့လည်း မှတ်ချက်ပေးပါတယ်။ လေးကေ့ကော်ဟာ ထိုင်းနိုင်ငံ၊ မဲဆောက်မြို့နဲ့ကပ်လျက် နယ်စပ်မြို့လည်းဖြစ်ပါတယ်။ ကရင်ပြည်နယ်၊ မြဝတီမြို့နယ်တောင်ပိုင်းက လေးကေ့ကော်မြို့သစ်အနီးမှာ စစ်တပ်နဲ့ ကရင်အမျိုးသားလွတ်မြောက်ရေးတပ်(KNLA) ပူးပေါင်းတပ်တွေရဲ့တိုက်ပွဲ ဆက်လက်ပြင်းထန်နေပြီး စစ်တပ်က မစ်ဇိုင်း(ဒုံးကျည်)တွေ၊ အသေခံဒရုန်းတွေကိုပါ အသုံးပြုနေတယ်လို့ စစ်ရေးအခြေအနေသိရှိသူတွေက အစောပိုင်းမှာ ပြောထားပါတယ်။ လေးကေ့ကော်မှာရှိတဲ့ စွယ်တော်ကုန်းဟာ လက်နက်ကြီးဗျူဟာကုန်းစခန်းဖြစ်ပြီး မြဝတီမြို့အနီးတိုက်ပွဲတွေအပြင် ထိုင်း – မြန်မာ နယ်စပ်လုံခြုံရေးအတွက်လည်း ဗျူဟာကျတဲ့စခန်းဖြစ်တယ်လို့ ဆိုပါတယ်။ KNLA နဲ့ ပူးပေါင်းတပ်တွေက စွယ်တော်ကုန်းစခန်းကို ပြီးခဲ့တဲ့နှစ် အောက်တိုဘာလမှာ သိမ်းခဲ့တာဖြစ်ပါတယ်။
